White squad pabiling No. 1 sa Abbariao Cup cagefest

CEBU, Philippines - Gipahugtan sa White team ang solong liderato human ilang gipukan ang Blue team ni District Collector Ronnie Silvestre, 73-68 niadtong Martes sa gabii sa 3rd Major Alfonso Abbariao Cup Biggest Loser 2012 Inter-color summer basketball tournament didto sa Basak San Nicolas gym, ning dakbayan.

Ang White team ni skipper Boodie Monteño nga naghupot na og 6-1 nga baraha, misandig sa katakus nilang Kenneth Maningo ug Andrew Yu aron makaipsot uban ang singko puntos nga kadaugan.

Naglabaw ang White team, 19-12 sa sayong bahin sa first quarter, apan ang Blue ni District Collector Ronnie Silvestre mibawos didto sa second quarter aron pahakan ang labaw ngadto na lang sa tres puntos sa halftime, 30-33.

Hinuon, daling nakarekober ang White ug gibalik nila pag-inat ang labaw sa fourth period, 54-48.

Si Maningo miposa og 18 puntos aron pangulohan ang White, samtang si Monteño midugang og 10 puntos. Ang Blue gipangulohan sab ni Ferdie Laraga pinaagi sa iyang 18 puntos, gisundan ni Mamasao Capalan nga adunay 12 puntos.

Sa sayo pa, midaug ang Green cagers pinangulohan ni triggerman Jingjing Rama batok sa Red, 95-87 alang sa ilang ikalimang daog sulod sa pito ka duwa.

Si Rama mihimo og rekord nga 43 puntos, lakip ang siyam ka three-pointers ug si Noel Medalle midugang og 21 puntos.

Ang kanhi UC Webmasters nga si Atty. Kern Sesante maoy nangulo sa Red nga miburak og 34 puntos.

PUNTOS MATAG USA

Unang duwa:

GREEN (95) - Rama 43, Medalle 21, Javellana 11, Bacalla 10, Datu 10

RED (87) - Sesante 34, Matugas 11, Cabahug 10, Mose 10, Mabalo 8, Apuya 4, Alipante 4, Quiño 2, Mantilla 2, Bailio 2

Ikaduhang duwa:

WHITE (73) - Maningo 18, Monteño 10, Yu 9, Rabago 8, Cañete 8, Sabanal 7, Paghasian 5, Dela Cruz 4, De Gracia 4

 BLUE (68) - Laraga 18, Capalan 12, Manahan 11, Laborte 11, Jervis 10, Silvestre 4, Dela Cruz 2  (BANAT SPORTS)