UC Webmasters para-third na lang

CEBU, Philippines - Daan nang nahibalo ang reigning CESAFI men's basketball champion University of Cebu (UC) Webmasters nga dili na sama kalig-on ang ilang team sa dihang nagduwa pa kanila ang 6-foot-9 center nga si June Mar Fajardo.

Ang UC Webmasters miluhod ngadto sa Jose Maria College sa Davao, 49-66 ug nahanaw na ang ilang paglaum nga moabante sa finals sa 64th National Students Basketball Championships (NSBC) kagahapon didto sa Dagupan City.

Pabor unta ang Webmasters crossover semifinals kay nipakita kini tilimad-on sa eliminasyon human nila gipukan ang JMC, 76-72.

Ang Webmasters moduwa na lang alang sa ikatulong puwesto batok sa mapilde sa duwa tali sa no. 2 Emilio Aguinaldo College (EAC) Generals ug sa no. 3 Lyceum Pirates.

Ang Webmasters maoy naghari sa 63rd edition sa torneyo duha ka tuig na ang milabay didto sa Butuan City. Walay NSBC sa miaging tuig. (BANAT SPORTS)