Mandaue boxing team andam modepensa sa ABAP boxing title

CEBU, Philippines - Kompiyansa ang defending champion Team Mandaue City nga mapanalipdan nila ang ilang regional title sa PLDT-ABAP Visayas Amateur Boxing Championship karong Enero 24 didto sa Dumaguete City.

Ang maong developmental amateur boxing tournament nga gimugna aron magsilbe nga training pool alang sa mga umaabot nga national team member gibahin sa duha ka dibisyon -- ang 15-under ug 18-under.

Daku ang pagsalig ni coach Peter Cuizon nga makahimo og "back-to-back" nga kadaugan ang iyang mga batos batok sa mga amateur boxers gikan sa Kabisay-an.

Naglangkob sa Team Mandaue mao ang managsuong Welmark ug Melmark Dignos, Ferde San Roque, Rolan Servania, Cherwellan Cantel, Mardy Muaña ug gold medalists nga sila si Dann Lou Codilla ug Kevin Jake Catajara.

Kun molampos ang Team Mandaue sa ilang kampanya,   moabante sila sa qualifying event alang sa National Championship sunod buwan didto sa Tagbilaran City.  (BANAT SPORTS)