Aries Lending champion na sa LLBA Rollway Cup 2011
CEBU, Philippines - Gidemolis sa Aries Lending ni team owner Tito Francisco ang Rulls Bakeshop, 82-64 sa ilang taktakay nga final match aron sakmiton ang championship trophy sa LLBA Rollway Cup 2011 second conference basketball tournament niadtong Biyernes sa gabii didto sa Villas Magallanes gym, Lapu-Lapu City.
Ang Aries Lending nagsalig sa kamangtas ni Lordef Jornales, kinsa maoy nangu sa koponan nga mipabuhagay og 21 puntos. Ang MVP nga si Jerome Plarisan mihabwa og 15 puntos, samtang ang ilang playing coach nga si Roger Bergado mitimbre og 11 puntos.
Sa laing bahin, si Alan Sepe, kinsa miugkat og 13 puntos mao sab ang topscorer sa runner-up nga Rulls Bakeshop ni team owner Rupert Cañizar. Usa sa ilang sinaligan nga si Er-Er Perez miligwat og 12 puntos.
Sa pasiunang duwa, ang Lily Warriors ni team owner Dr. Michael Ouano milubong sab sa Radaza Boys, 96-76 alang sa ikatulong dapit.
Si Uriel Manilag maoy nangu sa kadaugan pinaagi sa iyang 28 puntos, gisundan nilang Ryan Ceniza ug Diaz nga mipupo og 18 puntos matag usa.
Ang pilderong Radaza Boys gipangulohan ni Mario Bacale, kinsa miburak og 26 puntos, samtang si Pader Decembrano mibugha og 18 puntos.
Ang torneyo nahimong posible pinaagi sa suporta ni Rolly dela Pieza, Allan Yu, Michael Ouano, Billy Nadado ug sa JB Sportswear. (BANAT SPORTS)
- Latest
- Trending
