No.1 spot target ng NLEX kontra SMB
MANILA, Philippines — Ang panalo lang ang kailangan ng NLEX para opisyal nang makopo ang No. 1 spot sa crossover quarterfinal round ng Season 50 PBA Governors’ Cup.
Lalabanan ng Road Warriors ang San Miguel Beermen ngayong alas-5:15 ng hapon kasunod ang upakan ng Magnolia Hotshots at Rain or Shine Elasto Painters sa alas-7:30 ng gabi sa Ynares Center sa Antipolo City.
Solo ng NLEX ang liderato sa Group A bitbit ang 9-2 record kasunod ang San Miguel (8-3), Converge (8-4) at TNT Tropang 5G (7-5) at mga sibak nang Terrafirma (5-7), Titan Ultra (2-10) at guest team Macau (2-10).
Ang No. 1 team ang haharap sa No. 4 squad ng Group B sa isang best-of-five quarterfinals series.
“I think it’s one of the best games that you can play before the playoffs kasi you’re playing against a champion team, a team that has dominated here in the PBA for quite some time,” wika ni Road Warriors coach Jimmy Alapag sa Beermen.
“So, it will be a great test for our guys as we prepare for the quarterfinals,” dagdag ng PBA legend.
Binasag ng NLEX ang San Miguel, 110-96, sa una nilang pagtutuos.
“Whatever happens, kahit No. 1 or No. 2, we should be okay pero we’d still be going for a win kasi, sabi ko nga sa team, always go for the win, kahit no-bearing, para ‘iyung sharpness hindi mawala,” sabi ni Beermen coach Leo Austria.
Puntirya rin ng Hotshots ang top spot sa Group B papasok sa quarterfinals.
Nangunguna ang Magnolia sa Group B taglay ang 6-3 baraha sa itaas ng Rain or Shine (5-3), Phoenix (5-4), Barangay Ginebra (4-5), Meralco (4-6) at Blackwater (3-6).
- Latest
