Orasan sa olympics nagsugod na'g andar

CEBU, Philippines - Gipa-andar na ni United Nations Secretary-General Ban Ki-moon ang orasan isip pagsugod sa countdown ngadto sa pagbukas sa Olympic games didto sa London sa sunod tuig nga sugdan sa Hulyo 27, 2012.

 Ang maong seremonyas gitambongan ni nine-time Olympic Gold-medalist runner nga si Carl Lewis ug laing tulo ka U.S. Olympians diin ang maong kalihokan natumong sab sa pagdapit ni International Olympic Committee president Jacques Rogge sa mga atleta gikan sa nagkalain-laing dapit sa kalibotan didto sa inilang Trafalgar Square sa London nga mao sab ang mo-host sa Paralympic games.

Ang maong orasan adunay logo sa London Olympics logo ug makita sab ang mga numerong “2012” ug ang lima ka Olympic rings atubangan sa bagang duot sa mga U.N. ambassadors ug mga staff didto sa usa ka edipisyo sa may amihanang bahin sa U.N. headquarters tukmang alas 2:30 sa hapon nga matumong sab sa 7:30 sa gabii sa London kung kanus-a mahitabo ang Olympics usa ka tuig gikan karon.

“We’ve all heard of Big Ben,” matod pa ni Ban nga nagtumbok sa inila bantugan kaayong orasan nga nahimutang ibabaw sa tore Houses of Parliament sa London.

Mikomedya sab sa pag-ingon si Ban nga “Somebody suggested another possibility. Since it will be placed in the United Nations, we might perhaps name it ‘Big Ban,”’ ug mapahiyumon si Ban nga nag-atubang sa bagang duot sa katawhan nga nagkatawa sa iyang gisulti.

Si Lewis usa ka goodwill ambassador alang sa U.N. Food and Agriculture Organization, nagkanayon nga ang 193-member U.N. General Assembly mohimo'g resolusyon nga magpatawag sa tanang mga nasud sa pagtuman sa kasabotan alang sa kalinaw atol sa Olympics aron makasalmot ang tanang mga atleta.  - BANAT NEWS