Derby Ace nakatabla

CEBU, Philippines - Nakaginhawa pa ang Derby Ace Llamados dihang natabla nila ang serye, 2-2, batok sa Talk N' Text Tropang Texters, 98-93, kagabii sa Game-4 sa ilang "best of seven" semis series didto sa Araneta Coliseum.

Tungod niini, nakuha sa Derby Ace ang kahigayunan nga moilog sa labaw sa serye kun mulampos sila pagdaog sa Game-5 karong Miyerkules.

Gipauwanan og tres sa Derby Ace ang Texters sa first half sa pagpangulo ni reigning MVP James Yap ug KG Canaleta aron masakmit ang 48-35 nga labaw.

Si Yap maoy midala sa opensiba sa Derby Ace dihang miposa siya og 15 sa iyang kinatibuk-ang 26 puntos.

Nagpadayun ang swabeng opensa sa Llamados sa second half diin gitukod nila ang labing dakung labaw nga 21 puntos, 66-45, apan sayun ra kining nahilis sa final period human sa 21-5 rally sa Texters.

Hinuon, nakasustinir ang Derby Ace sa bangis nga atake human usab sa mga krusyal nga puntos nila ni Rico Maierhofer ug Marc Pingris.

Ang Texters gipangulohan ni Jimmy Alapag kinsa miposa og 22 puntos. - BANAT NEWS