Dance athletes morampa na sa Waterfront-Lahug

CEBU, Philippines –  Morampa na ang dance athletes gikan sa nagkalain-laing kanasoran sa pagsikad sa 2010 Cebu World DanceSport Open ug 5th Dancesport Sa Sugbu karong adlawa diha sa Pacific ballroom sa Waterfront Cebu City Hotel and Casino sa Brgy. Lahug, ning siyudad.

Lakip sa mga nasud nga mopakita'g aksiyon ning usa ka adlaw nga sinadsaray mao ang Bulgaria, Turkey, Australia, Canada, Singapore, Hong Kong, Korea ug ang host-Philippines.

Gawas sa mga pambato sa nasud, may mosadsad sab nga mga atleta gikan sa Metro Manila, Makati, Pasay, Pasig, Baguio, Tacurong, Sarangani, Cagayan de Oro, Zamboanga, General Santos, Davao, Dumaguete ug ang nabantog nga Dancesport-Team Cebu City (DTCC).

Bisan pa og ang DTCC maoy nagpasiugda sa kalihukan, mopakita gihapon sila sa ilang maayong labok.

Si Cebu City Sports Commission chairman Edward Hayco, kinsa maoy godfather sa dancesport miingon nga ang DTCC moapil sa tanang dibisyon gikan sa premiere ngadto na sa juvenile.

Giawhag ni Hayco ang local followers sa dancesport sa pagtan-aw sa kalihukan gikan sa pagsugod hangtod mahuman kay adunay mga batan-on karon nga mopakita og dakung potensiyal aron mamahimong masidlakon nga bitoon sa dancesport sa umaabot.  (BANATSPORTS)