Mga tang-ang chess players mosalmot sa Shell chessfest

CEBU, Philippines - Ang Central Visayas leg sa 18th Shell National Youth Active Chess Championship moulbo karong weekend anha sa University of San Carlos-North campus gym.

Mga dekalibreng magdudula gikan sa Cebu, Bohol ug Dumaguete ang gilaumang mopartisipar sa torneyo nga magsilbeng qualifying round alang sa National Grand Finals nga gikatakda karong Oktubre 23-24 didto sa SM Megamall sa Mandaluyong City.

Ang kompetisyon gibahin ngadto sa duha ka kategoriya -- ang juniors nga alang sa 20-anyos paubos ug ang kiddies alang sa 14-under players.

Aduna lamang 500 ka slots ang giandam sa matag leg.

Gipaluyohan sa Shell, ang torneyo nakabunga na og mga maayong chess players sama ni GMs Nelson Mariano II, Mark Paragua, Wesley So, Darwin Laylo ug John Paul Gomez, IMs Idelfonso Datu, Oliver Dimakiling, Ronald Dableo, Julio Catalino Sadorra, Richard Bitoon, Oliver Barbosa, Kim Steven Yap ug Sheerie Joy Lomibao.

Show comments