FYA misakmit korona sa JS Contractor's Cup

CEBU, Philippines - Gipukan sa F. Llamas Youth Association (FYA) ni skipper Tristan Rama ang Fatima, 100-94 aron sakmiton ang titulo sa Mawin’s Kitchen & JS Contractor’s Cup 2010 summer basketball tournament niadtong miaging adlaw didto sa Vicente Sotto Memorial Gym sa barangay Punta Princesa, ning dakbayan.

Sayong nanginit ang FYA ug naglabaw kini’g 15 puntos sa halftime, 58-43 sa kombinasyon    nilang Dexter Caballero, Dandan Enriquez ug John Llegunas.

Nakan-an hinuon ang labaw ngadto nalang sa sayes puntos, 69-75 paingon sa final period.

Si Noel Flordeliz maoy naghatag sa labing unang labaw alang sa Fatima, 85-84 sa nahabiling 2:47 sa duwa. Nainat pa kini ngadto sa tres puntos human sa basket ni Lalyn Demecillo, 87-84 sa nahabiling dos minutos sa duwa, apan dali kining napapas pinaagi sa three-pointer ni Dondon Cadungog aron tablahon ang iskor sa 93-all, sa katapusang 1:22 sa regulasyon. 

Sila si Caballero ug Tata Laborte nagkumboya og 29 puntos alang sa FYA   sa managsuong coaches Noel ug Baeng Medalle. Si Caballero miposa og 16 puntos, samtang si Laborte midugang og 13 puntos.

Ang pilderong Fatima gipangulohan ni Shiela Gonzales pinaagi sa iyang 20 puntos, gisundan ni Ely Tigbas nga adunay 19 puntos.

Laing upat nila ka teammates ang mi-iskor sab og double figures. Si Lalyn Demecillo mihimo'g 17 puntos, si Noel Flordeliz mitampo'g 15 puntos, si Nikki Castañares mipupo'g 13 puntos ug si Bimbo Caparas miani'g 10 puntos.

Sa sayo pa, naangkon sa Emilmich ang ikatulong puwesto pinaagi sa default batok sa Mawin’s Kitchen.

PUNTOS MATAG USA

FYA (100) - Caballero 16, T. Laborte 13, J. Llegunas 11, Enriquez 11, C. Llegunas 9, Tabares 9, Patalita 8, Rama 7, Villaver 7, Cadungog 6, R. Laborte 3

Fatima (94) - Gonzales 20, Tigbas 19, Demecillo 17, Flordeliz 15, Castañares 13, Caparas 10   (BANATNEWS)