CEBU, Philippines - Mipakita sa ilang kabangis ang mga batos ni Thai promoter Naris Singwangcha human gipangpukan ang tagsa-tagsa nila ka mga kaatbang sa “Pasalamat sa Diretso 3” boxing card didto sa Lapu-Lapu City Auditorium.
Unang miayag daog si Marco Demecillo Singwangcha sa Iligan nga nangayo la'g 37 segundos sa unang round aron paludhon ang Boholanong si Isidro Balabat.
Usa ka nagpungasi nga upper cut usab ang gipatugpa ni Jestoni Pepito Singwangcha ngadto sa suwang sa taga-Borbon nga si Aljon Sulagaol, kinsa nahayang sa nahabiling 45 segundos sa round four.
Si John Paul Bautista Singwangcha midaog sab pinaagi sa puntos batok ni Jerpol Valero sa Phil-Australia Gym sa Mandaue City. Tulo ka mga hurado mihatag og 58-56, 59-56, 57-57 pabor ngadto ni Singwangcha.
Si Rex Tito Singwangcha nakabangon human matumba sa unang round aron tiwason ang ilang sinukliay'g kumo batok ni Marjun Baliguat sa Rex 'Wakee' Salud (RWS) stable hangtod sa katapusang hugna. Ang ilang away miresulta sa "majority draw" human sa accidental headbutt ni Singwangcha ngadto ni Baliguat sa round 6.
Midaog si RJ Ano-os sa Liloan batok ni Ti Yamagata sa TI Boxing Gym pinaagi sa "unanimous decision."
Miresulta sab ngadto sa "draw" ang binakbakay nilang Renjie Abendan sa RWS stable ug Ervin Pulvera sa Consolacion human mahiagom og grabeng gisi sa kilay si Abendan sa 2:00 sa round 1.
Si Lionel Legada sa Jaro Boxing Stable mibuhi og makabungog nga one-two combination ngadto ni Edmar Tuñacao sa Phil-Aust Gym aron mokamang sa round 1.
Sa amateur competition, nanghawod ang mga boksidor gikan sa Flores Boxing Club human midaog og unom sa pito ka mga sangka. (BANATNEWS)