Cebu City namunit og mga bulawan sa CVIRAA

CEBU, Philippines - Namunit dayon og mga bulawan ang Team Cebu City sa unang adlaw sa 2010 Central Visayas Regional Athletic Association (CVIRAA) Regional Meet kagahapon didto sa Ramon Durano Sr. Memorial Sports Complex, Danao City.

Sa unofficial medal tally, ang Cebu City kasamtangan karon nag-una nga mikubkob og walo ka golds, unom ka silvers ug pito ka bronzes. Hinuon, overall standings ning usa ka semana nga kompetisyon motamod sa points system ug dili sa medalya.

Si Mylene Kimberly Alforque maoy mihatag sa Cebu City sa labing unang bulawan sa athletics human milayat sa gilay-on nga 4.43 metros aron paghari sa girls long jump. Ang iyang teammate nga si Sarah Mae Napoles mao ang midaog sa silver sa distansya nga 4.4m.

Ang Team Cebu City namawi sa swimming competition dihang mihakot kini og pito ka bulawan sa pagpangulo ni Anthony Linn Navarro sa Cebu Eastern College. Si Navarro misakmit og duha ka individual gold medals.

Si Navarro mao ang nangharos sa elementary level sa 200-meter individual medley sud sa duha ka minutos ug 49 segundos ug sa 400m freestyle sa oras nga 5:17.66.

Gawas ni Navarro, sila si Danielle Mae Ballesteros ug Palaro gold medalist Loren Dale Echavez mitunol sab og bulawan sa Cebu City.

Si Ballesteros midaog og gold pinaagi sa 200-M IM sa oras nga 2:58 ug silver sa 50m breaststroke, samtang si Echavez maoy nag-una sa secondary girls 400m freestyle sa oras nga 4:57.07. Si Beth Arellano mikabkab sab og bulawan sa 200m IM.

Ang Team Cebu City mao sab ang nanghawod sa secondary boys 4x100m relay. Ang lumad nga taga-Danao City, apan miduwa sa Team Cebu City nga si Jebb Cane midaog sab og bulawan sa 200m IM.

Kasamtangang nagsunod sa Cebu City sa standings mao ang Dumaguete City nga adunay 6-7-5 gold-silver-bronze medal tally, ang Cebu Province (3-3-2) ug ang Bohol (3-1-4) mao ang mipahiluna sa ikatulo ug ikaupat nga dapit.

Ang Tagbilaran nahimutang sa ikalimang dapit nga adunay usa gold, duha ka silvers ug usa ka bronze. – BANAT NEWS