Cavs taktakonon, Magic, 3-1 lead na 44 puntos ni James wala kaluwas sa Cleveland

CEBU, Philippines - Naglawig na balik ngadto sa NBA Finals ang Orlando Magic dihang ilang gitiwasan ang no. 1 team Cleveland Cavaliers human sila maka-ipsot sa overtime, 116-114 atol sa Game-4 sa ilang "best-of-seven" Eastern Conference Finals kagahapon didto   sa Amway Arena sa Orlando, Florida.

Nahimutang na karon sa makuyaw nga kahimtang ang Cavs, kinsa kinahanglang moharos sa katapusang tulo ka duwa aron masalbar ang ilang kampanya alang sa korona.

Ang kasaysayan pabor ngadto sa Magic tungod kay ang team nga nakakuha’g 3-1 nga abante, mao gyud ang milahos sulod sa 182 ka higayon ug walo lang ka teams ang nakahimo’g comeback gikan pa sa tuig 1947.

Ang Game-5 adto ipahigayon sa Cleveland ugma diin ilang likayan nga adto sila ihawon sa Magic.

Si Dwight Howard mipasulod og 10 puntos sa overtime ug maoy nangulo sa Magic pinaagi sa iyang 27 puntos ug 14 ka rebounds, gisundan ni Rafer Alston, kinsa mibugha og 26 puntos lakip ang unom ka three-point shots.

Ang Magic, kinsa adunay 26-14 scoring sa ilang bench, mihimo’g 16 ka triples   itandi sa Cavs nga nakapasulod lang og unom ka triples — upat kang LeBron James ug duha kang Daniel Gibson

Ang 44 puntos ni James wala makapiog sa Magic gumikan kay matag hana nila’g sikit, baslan man dayon sila og three-pointer.

Si Mo Williams, kinsa migarantiya nga ila gyud dag-on ang Game-4, mi-iskor og 18 puntos, samtang sila si Delonte West ug Zydrunas Ilgauskas nagkumboya og 29 puntos.

Ang mga tirador sa Magic nga sila si Rashard Lewis, Hedo Turkoglu ug Mickael Pietrus parehong miabuno og double figures. Sila si Lewis ug Pietrus   miposa og 17 puntos matag usa ug si Turkoglu midugang og 15 puntos.

Kahinumduman, niadto pang 1995 katapusang nakatilaw og NBA Finals ang Magic, apan gipukan sila sa Houston Rockets ubos sa pagtimon ni Hakeem Olajuwon. - BANAT NEWS