Green K2 mimakmak sa White

CEBU, Philippines – Mirehistro sa ilang ikaduhang daog ang Green K2 quintet ni Nestor Kyamko pinaagi sa pagpukan sa White team nga gipaluyohan sa Sunpride Sunny Hotdog, 98-87 niadtong Domingo sa Still Fighting Athletics Association (SFAA) didto sa CEC gym.

Sa lain pang mga duwa, ang Blue-Pitogo team midaog batok sa Maroon team sa iskor nga 79-71, samtang ang Black team nga gipaluyohan sa AC Sports ni team owner Archie Baba midaog sab og otso puntos batok sa Yellow-Master Drug team sa iskor nga 69-61.

Ang tang-ang sentro nga si Jun Seno mihakot og 21 puntos ug ang idlas nga   guwardiya nga si Roger Tan midugang og 20 puntos alang sa Green K2.

Sila si Tata Deluya ug Bebot Batad nagkumboya og 32 puntos alang sa White nga nakatilaw sa ilang unang pilde sa duha ka duwa.

Sa laing bahin, ang Blue mipakanaog og 32-19 nga rally sa fourth period aron pagbuntog sa Maroon sa iskor nga 79-71. Si Ben Pitogo mi-iskor og 16 puntos sa fourth period sa kinatibuk-an niyang 25 puntos.

Sa ilang habig, ang Black mirehistro og 17 puntos nga labaw paghuman sa third period, 47-30 ug wala na kini molingi pa sukad niadto. Si Michael Sumayang mirehistro og tournament-high 34 puntos alang sa Black.

Puntos Matag Usa

Unang duwa:

Green (98) - Seno 21, Tan 20, Misa 17, Lumayag 11, Juablar 10, Dayondon 8, Kyamko 5, Ocampo 2, Padillo 2, Estrada 2

White (87) - Detuya 17, B. Batad 15, E. Batad 12, Banilad 10, Edera 7, J. Tesorero 6, Garcia 6

Ikaduhang duwa:

Blue (79) - Pitogo 25, Emol 19, Viscayno 16, Cabahug 5, Salahid 4, Managaytay 4, Tesorero 2, Apas 2, Abonitalia 2

Maroon (71) - Sabellano 27, Cabreros 15, Godinez 6, Cabangang 6, Padz 5, Nalayog 4, Taboada 3, Ceballos 2, Ando 2 Torion 1

Ikatulong duwa:

Black (69) - Sison 11, Godinez 10, Ando 8, Desierto 8, Bandolon 7, Elizondo 6, Piloton 5, Baba 5, Sialana 3, Bejaresco 2, Fernandez 2, E. Tesorero

Yellow (61) - Sumayang 34, L. Ladonga 9, Abanes 8, Espina 4, A. Ladonga 2, Guerrero 2, R. Ladonga 2 – BANAT NEWS