Inoc nidaog na gyud expert title sa 2009 MS Motosuit motocross

CEBU, Philippines – Sa katapusan, nakab-ot na gyud ni Paolo Inoc ang dugay na niyang gihandom dihang iyang naangkon ang korona sa expert division sa 7th Mayor Mariano Martinez Cup nga magsilbeng 8th leg sa 2009 MS Motosuit Motocross Series niadtong Domingo didto sa San Remigio.

Daku kaayo ang garbo ni Paolo Inoc gumikan kay napuhalan niya ang kanhi rider of the year awardee nga si Juvanni Abellar, kinsa maoy nagsunod kaniya ug si Clark Wagas nga maoy mi-okupar sa ikatulo nga dapit.

Hinuon, sila si Wagas ug Inoc nag-ilis og puwesto sa intermediate class. Si Wagas maoy nidagit sa titulo, samtang si Inoc napunta sa ikatulo. Si Jubenile maoy niangkon sa ikaduhang puwesto.

Sa laing bahin, si   Seigfred Ornopia, ang 2009 rider of the year ug si Donkey Sanchez midaog og duha ka titulo ning maong series nga gipaluyohan sa Castrol Philippines.

Gidominar ni Ornopia ang beginners open production batok nilang Ryan Querol ug Donkey Sanchez nga miangkon sa ikaduha ug ikatulo nga dapit. Naghari sab si Ornopia sa Executive-A human iyang gipilde sila si Aloy Igot ug Jun Enriquez.

Wala hinuon magminghoy

sila si Sanchez ug Enriquez bisan pa sa ilang kaparotan ngadto sa mga kamot ni Ornopia kay nidaog man sila sa laing dibisyon.

Si Sanchez nidaog sa open enduro batok nilang Ayen Ledesma ug Boni Bustillo ug sa novice open production title batok nilang Ryan Querol ug Ornopia.

Sa iyang bahin, si Enriquez misakmit sa Executive-B title batok nilang Nonoy Reluya ug Aloy Igot nga nipahiluna sa ikaduha ug ikatulo nga dapit.

Sa Executive-C, ang mga top three finishers mao sila si Dr. Felipe Montejo, Roscel Gungob ug Sergio Chua.

Sama sa miaging leg, si Boni Bustillo misanta sa pangandoy ni Sanchez nga molumpong og tulo dihang iyang gidominar ang local enduro class. Si Ryan Querol napunta sa ikatulo.

 Sa mini class, padayong nanghawod si Earl Jean Brylle Ornopia human niya gipilde si BJ Pepito, kinsa mipahiluna sa ikaduha, samtang si Tamtam Largosa nahimutang sa ikatulo.

Wala sab hinuon magmahay si Pepito sa iyang kapildihan kay nidaog man siya sa peewee class below-7 category. – BANAT NEWS