Mas dako ug mas nindot nga motocross series sunod tuig

CEBU – Human sa usa ka malampusong tuig, ang MS Motosuit big boss Lou Ornopia nipadayag niadtong miaging adlaw sa iyang giplanohang mas dako ug mas nindot nga motocross series sa umaabot nga tuig 2009, kini iyang gibutyag atol sa awarding ceremony nga gipahigayon niadtong miaging gabii didto sa grand ballroom sa Holiday Plaza Hotel.

Si Ornopia kinsa gipasidunggan isip “Sportsman of the Year” sa Sportswriters Association of Cebu (SAC), naglaraw nga magmugna og usa ka twin series sunod tuig, usa alang sa night supercross ug usa alang sa fourth leg sa annual MS Motosuit series.

Gawas sa mga dagkong lumba, si Ornopia magbutang usab og usa ka video production aron mahatagan og exposure ang mga local talents aron musulbong sila isip world-class racer.

Nipakita usab sa iyang suporta si Mayor Avelino Gungob Sr. sa lungsod sa Consolacion, alang sa tinguha ni Ornopia nga mas mapanindot ang motocross racing nga hinay-hinay na karong nisikat dinhi sa atong nasud.

Atol sa awarding ceremony, gikoronahan si Siegfred Ornopia nga “Rider of the Year”. Ang sports writer nga si Caecent No-ot Magsumbol sa The Freeman mao usab ang gipasidunggan isip “Sports Writer of the Year”, mao kini ang ikatulong sunod-sunod nga higayon nga iyang gisakmit ang award alang sa iyang pag-cover sa mga motocross events dinhi sa Sugbu.

Lakip sa nakadawat og award mao sila si Boni Bustillo (local enduro ug novice enduro), Keith Galaura (mini class), Clark Wagas (novice production), John Flores (beginners open production), Geber Sicad (executive B), ug Irwin Ramas-Uypitching (best expert rider). (Lemuel P. Maglinte) (BANAT NEWS)