Cebu Movers 3-0 sa GAA

Cebu - Nag-igo pag-ayo sa iyang mga jumpshots ang playing coach sa Cebu Movers System nga si Dr. Boy Te aron pagtimon sa iyang koponan ngadto sa usa ka yanong kadaugan batok sa Ramboys sa iskor, 72-59 aron paglansang sa ilang ikatulong daug atol sa nagpadayon nga Guadalupe Athletic Association (GAA) 9th Founders Cup basketball tournament didto sa Guadalupe Sports Complex kaniadtong Domingo sa gabii.

Ang maong kadaugan naghatag sa Movers ug 3-0 nga baraha ug mao sab kadto'y ilang labing daku nga winning margin sulod sa tulo ka duwa.

Ang Movers karon maoy naghupot og record sa GAA isip labing taas nga winning streak nga 13-0 lakip ang 10-0 sweep sa miaging torneyo nga natapos duha na ka buwan ang milabay.

Tungod sa ilang kadugan, nagkaduol na sab sa semifinals ang Movers apan pangagpas ni coach Te nga lisod himuon pag-usab ang laing sweep tungod kay nagpalig-on man ang ubang team.

Sama sa naandan, gipangulohan sa scoring leader sa Movers nga si lInting Reyes ang ilang opensa pinaagi sa pag-iskor og 17 puntos apan tungod kay nag-igo man sab ang mga tirada sa iyang mga kauban, mas taas sab ang iyang pahuway ilabi na kay si coach Te maayong nakadiskarte sa iyang baraha ug nakatampo pa gyud sa opensa pinaagi sa iyang 12 puntos.

Si Edgar Labra mi-iskor og 15 puntos alang sa Movers ug si Doming Leyson mitampo sab og 12 puntos.

Samtang nagduwa si Te, ilang gilampaso og maayo ang Ramboys pinaagi sa pag-outscore sa ilang kaatbang, 28-8 sa second period aron pagposte og 41-23 nga labaw sa halftime.

Wala na’y laing gikabuga ang Ramboys hangtod nakabsan sab sila’g bala tungod kay wala na sila mag-igo sa ilang mga tirada bisan pa man sa pagpangu ni kanhi SWU Cobra Alvin Plaudin kinsa moay nangu sa Ramboys sa iyang 26 puntos.

Sa laing duwa kaniadtong Domingo, ang AquaServ Drinking Water midaug batok sa McMill Trading sa iskor, 75-68, gipanitan sa Team MELO ang Tigers, 75-67 ug napakgang sa Pecus ang 2171 Platoon, 65-62.

Mopahuway una og pipila ka adlaw ang torneyo sa GAA ug mobalik sila’g duwa unya pa sa Enero sunod tuig aron pagsaulog og bakasyon atol sa Pasko ug sa Bag-ong Tuig.

Puntos kada usa:

Cebu Movers (72)—Reyes 17, Labra 15, Te 12, Leyson 12, Alquizola 8, Gonzales 8

Ramboys (59)— Plaudin 26, Gabutan 9, Tesorero 8, Gabucan 7, Tojoy 4, Superales 3 Halftime: 41-23 - Gabby G. Malagar (BANAT NEWS)