CESAFI coaches' meeting karon sa Cebu Country Club

CEBU - Gipahibalo ni Cebu Schools Athletic Foundation, Inc.(CESAFI) commissioner Felix O. Tiukinhoy, Jr. nga adunay pagahimuon nga coaches’ meeting karong adlawa kalabot sa format ug mga lagda sa umaabot nga Partners’ Cup tournament nga gikatakda sa Enero 4, 2009 sa Cebu Coliseum.

Ang tigum sugdan sa alas-12 sa udto diha sa Cebu Country Club tennis court function room.

Si Tiukinhoy mipatawag sa atensiyon sa nagkalain-laing athletic directors sa CESAFI-member schools aron maoy mopahibalo sa ilang coaches kabahin sa tigum.

Mga representante gikan sa nagkalain-laing mga tunghaan mao sila si Chris Mejarito sa University of the Visayas, Dioscoro Himotas sa University of San Jose-Recoletos, Bro. Lando Sanchez sa University of San Carlos, Bernard Ricablanca Jr. sa University of Cebu, Ryan Aznar sa Southwestern University, Glenn Albutra sa University of Southern Philippines Foundation, Eugene Ynclino sa Don Bosco Technology Center ug Alex dela Torre sa Cebu Institute of Technology.

Ang commissioner sa Partners’ Cup nga si ex-PBA Mon 'El Presidente' Fernandez maoy mangulo sa nahisgutang tigum.

Ang mga coaches nga gi-awhag nga patambungon mao sila si Elmer 'Boy'” Cabahug sa UV, Edito Salacut sa USJ-R, Jay Ramirez sa USC, Roel Gomez sa UC, Dodie Miego sa SWU, Raul Latonio, Sr. sa USPF, Rudy Enterina sa Don Bosco ug Alex dela Torre sa CIT.

Gawas kang Tiukinhoy, motambong sab sa meeting si UC team manager Atty. Baldomero C. Estenzo. – BANAT NEWS