Magsumbol midaog sa 'Sportswriter of the Year' award

Sa ikaduhang higayon, ang sportswriter sa The Freeman, ang igsuong mantalaan sa Banat News mao na usab ang gitunol  og award isip MS Motosuit Motocross Series "Writer of the Year"  atol sa awarding ceremonies sa 2007 MS Motosuit Motocross Series niadtong Sabado sa gabii didto sa Grand Convention Center of Cebu.

Sa miaging tuig, si Magsumbol mao sab ang napili  isip  2006 MS Motosuit Writer of the Year.

Sila si San Remigio Mayor Mariano Martinez ug San Fernando Mayor Neneth Reluya uban ni Cebu City Sports Commissioner ug The Freeman managing editor Nimrod NL Quiñones maoy nangulo sa mga dinapit mahinungdanong kalihukan nga gipasiugdahan ni businessman ug sports patron Lou Ornopia, ang SAC-SMC All-Cebu Sports Awards Sportsman of the Year sa miaging tuig.

Nangulo sa mga awardees kagabii mao si Jubannie Abellar, kinsa maoy gitunolan og pasidungog isip Rider of the Year tungod sa iyang taas nga nakolektang puntos sa 11-leg series.

Gawas nga Rider of the Year,  si Abellar mao usab ang naghari sa intermediate class.

Lain pang mga awardees mao sila si MS Motosuit image model John Flores sa mini division, Ayen Ledesma sa open enduro ug beginner's open production, Andot Rubi sa executive A, Seigfred Ornopia sa executive B, Paulo Inoc sa novice open production ug Donkey Sanchez alang sa local enduro.