Abellar mangulo sa mga awardees

Ang mga top riders sa 2007 MS Motosuit Motocross Series pormal nga pasidunggan atol unya sa usa ka bonggang seremonyas sa Enero 19 diha sa Grand Convention Center of Cebu.

Mag-una sa mga pasidunggan mao si Jobannie Abellar, ang "Rider of the Year"  awardee.

Si Abellar midaog sa maong award tungod sa iyang dakung puntos nga nakuha human sa 11 ka legs nga adunay 279  sa premier experts class. Nagsunod niini mao ang beteranong si Pepo Rubi nga nakahipos og 253 puntos.

Dobleng selebrasyon ang naangkon ni Abellar kay siya man sab ang nanghawod sa intermediate class.

Sa iyang bahin, ang official endorder sa MS Motosuit nga si John Flores  pabiling milingkod sa iyang trono isip hari sa mini division human makapupo og dakung iskor sa 11-leg series nga adunay 370 puntos.

Si  Ayen Ledesma, nikolekta sab og duha ka overall championship trophies dihang iyang gidominar ang open enduro ug beginner's open production.

Lain pang overall champion sa ilang tagsa-tagsa ka kategoriya mao sila si Andot Rubi sa executive A, Seigfred Ornopia sa executive B, Paulo Inoc sa novice open production ug Donkey Sanchez sa local enduro.

Ang big boss sa MS Motosuit nga si Lou Ornopia, ang "Sportsman of the Year" honoree sa Sportswriters Association of Cebu-San Miguel Corporation (SAC-SMC) All-Cebu Sports Award sa miaging tuig miingon nga adunay dirtbike accessories  ug giveaways ang ripahon atol sa maong kalihukan.

Ang manghod ni Lou nga si Seigfred Ornopia ug tag-iya sa Keiz BZ's midonar sab  og usa ka unit nga Crypton motorcycle nga i-raffle sa nagkadaiyang  category champions.

Ang 2008 edition sa MS Motosuit Motocross Series pormal sab nga ilusad human sa awarding ceremonies.