Sugal sa mga estudyante

Niining bahina sa akong lindog, tugoti nga akong hatagan og luna kining text nga akong nadawat gikan sa usa ka magbabasa nga tag-iya sa cellphone number 0910-9230269. Ang iyang text usa ka reklamo nga sa akong pagtuo, angay gayod hatagan og pagtagad tungod kay makaapektar man kini sa kaugmaon sa mga estudyante.

Ang reklamo sa atong texter mahitungod nianang usa ka bilyaran diha dapit sa may UV main. Kining nag-text nako usa ka estudyante sa maong tunghaan ug naka-obserbar siya nga adunay bilyaran nga nahimutang duol sa ilang tunghaan nga magpadula sa mga estudyante bisan sa panahon sa tingklase.

"Grabe na kaayo ang sugal sa mga estudyante," nagkanayon ang atong texter. "Bisan tingklase naay sugal kay walay pili ang management sa bilyaran."

* * *

Samtang mitabang kita sa pag-promote sa dulang bilyar pinaagi niining maong lindog, dili usab maayo nga pasagdan na lang nato ang mga batan-on nga mahisimang sa matul-id nga dalan tungod sa ilang pagkahingag sa maong dula. Mao nga kun ang pagdula og bilyar himuon nang medium sa sugal nga makaapektar sa pagtuon sa mga estudyante, kana dili na usab maayo.

Gihinganlan sa atong texter ang ngalan sa bilyaran diha duol sa usa ka unibersidad nga magpadula og mga estudyante bisan sa panahon sa tingklase apan wala lang una nato ibutyag in fairness sab ngadto sa tag-iya ug tagdumala niini. Apan pinaagi niining maong lindog, awhagon nako ang tanang tag-iya og bilyaran nga nahimutang duol sa university belt nga mas maayong i-regulate nila ang pagdawat og mga magdudula sa ilang bilyaran.

* * *

Dili ko moawhag nga sirad-an ang mga bilyaran nga naduol sa mga eskuylahan sa panahon sa tingklase sanglit nakasabot kita nga ila kanang negosyo. Pero mas maayo tingali nga ang mga tagdumala mismo sa maong mga bilyaran ang magpatuman og estriktong mga sumbanan ug dili gayod tugotan ang mga estudyante nga makadula. Kini gong mga estudyante nga gusto gyong modula, mamakak man sa pagpatuo nga wala silay klase nianang orasa bisan ang tinuod aduna, tungod kay gusto lagi silang modula.

Mao nga aron dili malutsan ang mga bilyaran niining mga estudyante nga imbes adto magyampungad sa classroom pero anaa na hinuon magkanunayan sa bilyaran, mas maayo nga dili gayod tugotan ang mga estudyante nga makadula panahon sa tingklase. Bahala na'g unsay ilang ipatuo nga katarongan, walay klase o vacant period ba kaha nila, mas maayong dili na lang gyud sila padulaon aron pagseguro.

Dili makiangayon kun seguroon lang sa mga tag-iya og bilyaran ang pagpalambo sa ilang negosyo bisan pag nagkahulogan na kini sa mangitngit nga kaugmaon sa mga estudyante nga mopalta sa ilang klase aron lang makadula og bilyar.

* * *

(Mga sugyot ug pakisayod? Text sa 0910-8105522)