Mga torneyo angay pasiugdahan

Kun mosuroy ko sa lain-laing dapit sa Kabisay-an ug Mindanao, usa sa makadapit sa akong pagtagad mao ang mga bilyaran nga nanuyhakaw sa nagkadaiyang mga dapit. Kun unsa kainit ang boxing sports karon dinhi sa atong nasud, mao usab tingali ang billiard sport. Mas daghan pa gani tingali og partisipasyon ang billiard kay sa boxing kun bahin sa mga enthusiasts ang hisgutan.

* * *

Didto sa Tagbilaran City, sikat na kaayo ang Bilyaran sa Graham nga nahimutang sa Graham Avenue. Karong bag-o, nabaniog na sab ang Adel Buena Billiard Hall sa Dao, Tagbilaran City, atbang sa Integrated Bus Terminal. Nakamatikod sab ko nga may dakung dealer ug buhatan na sa mga billiard table ug billiard accessories sa Tagbilaran City nga nahimutang sa CPG Avenue. Kini nagpasabot lang nga gawas sa Cebu, nahisama na usab sa init nga bibingka sa Mandaue ang billiard sport didto sa Bohol ug sa ubang mga lalawigan.

* * *

Pero unsay kaugmaon sa atong mga magdudula nga nagpunay og yampungad sa maong mga bilyaran? May mapaabot kaha silang tingusbawan sa kanunay nilang pagtungkawo sa mga bilyaran sa kabarangayan ug kalungsoran sa lain-laing kaprobinsiyahan? Unsay ilang umaabot.

Dili ko buot maghuna-huna nga ang billiard sport maoy nahimong dula sa mga estambay ug walay trabaho. Tinuod nga daghan ang nagdula og bilyar nga mga edukado ug propesyonal, ilabi na sa mga dakbayan. Pero mas daghan gayod kadtong mga walay trabaho ug ang pagdula og bilyar maoy gihimo nilang yawe sa pagpukan sa kalaay ug pagpatay sa oras.

* * *

Niining puntoha, nakaingon ko nga angay gayod magpakabana ang mga tag-iya og bilyaran. Dili igo ang pagtukod nila'g bilyaran aron kadulaan sa mga mahiligon. Angay usab nilang tabangan ang mga mahiligon aron makabaton og maayong kaugmaon pinaagi sa pagdula og bilyar.

Angay magpasiugda og torneyo ang mga bilyaran. Dili lisud ang pagpangita og sponsor basta magkugi lang. Daghan ang interesadong mosuporta kun ang kalihukan may kalabotan sa paugnat sa kusog. Ilabi na gayod kun ang duolon usa pud ka billiard aficionados. Daghan nang mga bilyaran nga nagpasiugda og torneyo. Kini angay pud sun-on sa uban aron molambo ang abilidad sa atong mga lokal nga bilyarista. Pinaagi niini, madasig ang mga magdudula sa pagpadayon og bakyaw sa ilang tako aron pagdula og bilyar.

* * *

(Makalingaw ang pagdula og bilyar nga pustaanay. Apan mas makalingaw kun ang bilyaran magpasiugda og torneyo. Bisan ginagmay lang gud ang premyo. Ang importante mao nga may pakonsulyo sa atong mga magdudula.

* * *

Malipayong pagbasa sa Banat News ngadto sa mga magdudula sa 8 Raxz Billiard Hall sa Pusok, Lapu-Lapu City sama nila ni Henry Igot, Oliver Yap ug Dicoy.

* * *

(Text sa 0910-8105522)