Nausik 36 puntos ni Yao Ming

Walay kapuslanan ang nahimong 36 puntos ug siyam ka rebounds sa Tsinong sentro nga si Yao Ming gumikan kay ang iyang koponang Houston Rockets naugbok man sa New Jersey Nets.

Si Vince Carter ni-iskor og 29 puntos ug si Jason Kidd miamot og 11 puntos, 10 rebounds ug 10 assists, maoy iyang ika-73 triple-double sa iyang career aron pagpangulo sa Nets ngadto sa kadaugan sa iskor nga 90-77 sa nagpadayong aksiyon sa National Basketball Association kagahapon.

Si Yao Ming nakaabot og 20 puntos sud sa 11 ka mga duwa ug ikalima nga 30-point performance sa katapusang unom ka duwa.

Apan sila si Carter ug reserve Clifford Robinson maoy nagpasiugda og 20-7 run sa second quarter aron sa pagpa-abante sa Nets ngadto sa 42-35. Gikan niadto wala na makalabaw pa ang Rockets.

Sa maong kadaugan, ang Nets nakabitik na og 34-28, samtang ang Rockets nakapamasada og 29-35.