3 Pinoy chessers nagtungo sa Spain

Tatlong Filipino chess players ang tumulak kamakalawa ng gabi sakay ng Air France upang makipagpigaan ng talento sa 2004 Balaguer International Open Chess Championship na susulong sa Hulyo 12-20 sa Balaguer, Spain.

Ang kampanya ng bansa sa nasabing kompetisyon ay babanderahan ng miyembro ng Vietnam Southeast Asian Games rapid gold medalist na si IM Jayson Gonzales, kasama sina IM Ronald Bancod at IM-candidate Yves Rañola.

Si Gonzales ay betaranong player sa mga international arena kung saan maraming beses na rin itong nanalo sa mga kompetisyon sa Amerika.

"Nawa’y ipagdasal ninyo po kami na makakuha kami ng Grandmaster results," wika ng enlisted member ng Philippine Army na si Gonzales na isa ring board 5 gold medalist sa 14th Asian Cities Chess Championships sa Tagaytay City.

Sa kabilang banda naman, sisikapin ng dating National Junior champion na si Rañola na makumpleto ang kanyang International Master status.

"Gagawin ko ang best ko para makuha ko na ang final IM results," pahayag naman ng dating national junior champion na kulang na lamang ng isang norm upang ganap na makuha ang kanyang IM title.

Samantala, minabuti na lamang nina IM-candidate Darwin Laylo; IM-candidate Rolando Nolte; NM Rolly Martinez at candidate master Roland Salvador na umatras sa Balaguer Open sa Spain upang sumabak sa kasalukuyang ginaganap na semifinal round ng 2004 National Chess Open na magsisilbing qualifying event para sa RP team na lalahok sa World Chess Olympiad sa Spain.