2nd win puntirya ng John-O Juzz, ICTSI-La Salle

Ikalawang panalo na magpapanatili sa kanilang paghawak sa liderato ang kapwa pupuntiryahin ng John-O Juzz at ICTSI-La Salle sa magkahiwalay na laban ngayon sa PBL Chairman’s Cup na ang aksi-yon ay dadako sa Pasig Sports Complex.

Susukatan ng lakas ng Blu Sun Power ang John-O Juzz sa alas-4 ng hapon, habang makikipagtunggali naman ang ICTSI-La Salle sa Ana Freezers sa main game sa alas-6 ng gabi.

Mauuna rito, sasabak na sa aksiyon ang RP-Youth Team kontra Kutitap sa alas-2 ng hapon bilang pampagana kung saan tangka ng National na makapagsagawa ng isang magandang debut.

Isang sorpresa ang ginawa ng Juzzers sa opening nang kanilang silatin ang Ana Freezers, 102-101 at ang panalong ito ang nais na duplikahin ng Juzzers.

"Luck was on our side then but against Blu, they’ve been together for quite a long time compared to us. And even if we won our debut game, there’s a lot of adjustments we have to do," wika ni coach Manny Dandan.