Huni Kang Santo Padre Pio nagmalampuson

CEBU, Philippines — Nagmalampuson ang Huni Kang Santo Padre Pio Alang sa Santuario niadtong Sabado sa gabii  nga gipahigayon sa IEC Convention Center.

Nakalangkat sa unang puwesto ang awit nga "Oh Francisco, Our Padre Pio" nga tinagik nila ni Hardie Bigcas ug Ma. Angelica Bigcas.

Ang maong awit nga gi-arrange ni Neil Salarda kay gi-interpret nila ni Florimae Comahig ug K-Jay Remoto.

Nakaangkon sa ikaduhang ganti mao ang "Oh Padre Pio, I-Ampo Mo" nga gi-compose ni Jeson Evalarosa Buynay ug gi-interpret ni Veronica Jañola

Samtang ang ikatulong puwesto kay nakuha sa "Wounds of Love" nga gisuwat ug gi-interpret ni Jay-arr LIbrando.

Mao kini ang  labing una nga songwriting competition nga gidumala sa Saint Padre Pio Home for the Relief of Suffering-Philippines Foundation Inc. .

Tumong niini ang pagpahibaw sa kadaghanan alang sa mga maayong nahimo ni Santo Padre Pio.

Ang  nahipos nga pundo  sa maong kalihokan kay gamiton sa  nagpadayon nga konstruksyon sa Santuario ni Padre Pio nga nahimutang sa Barangay Pulangbato, bukirang bahin sa Dakbayan sa Sugbo.

Suma pa sa presidente sa maong foundation nga si Maximiano Fulache nga espesyal kaayo sa kinabuhi sa katawhan ang mga maayong binuhatan sa St. Padre Pio nga nitabang gyud sa mga nanginahanglan.

Ang Sugbuanon nga aktres nga si Kim Chiu maoy special guest sa maong kalihokan.

Gikagobtan og maayo ang aktres atol sa pagtungtong niya sa entablado.

Gibutyag sa aktres nga deboto ang iyang pamilya ni Santo Padre Pio busa dakong garbo alang kaniya nga mahimong kabahin sa Huni Kang Santo Padre Pio Alang sa Santuario.