Pugngan sa uyab

Dear Tito Miguel,

Ako diay si Yssa, taga Labangon, Cebu City, naa ko’y uyab nga ginganlan og  Gilbert nga taga Barangay Guadalupe, Cebu  City.  Akong problema ron kay dili man supportive akong uyab  sa akong career uy.  Bokalista ko sa usa ka banda, ug  nakadawat og offer ang among grupo nga regular gig sa usa ka hotel sa Boracay.   

Dili man siya mosugot uy, kay dili siya kaagwanta og  long distance relationship (LDR) . Unsa ang angayan nakong buhaton Tito Miguel  aron ako siya nga mapasabot? —Yssa

Yssa,

Ingna nga inay nga magdumili siya sa long distance relationship, inyo kining hangpon aron masukod asa taman inyong gugma. Hadlok siya, kun malayo mo sa usa’g-usa, makakita ka o mangita’g lain. O siya mismo. Kun mahitabo iyang gikahadlokan, dili pa lig-on inyong gugma sa usa’g-usa. Kay nganong matintal man mo sa lain. Ang mga panuway moabot gyud na maski asa o maski unsa orasa, apan sa tawo nga ligdong, siya magpabilin nga tarong.

Hadlok siya, sa kadugay ninyo dili magkita, basin mohupas ang gana o gugma sa usa’g-usa. Mao ra gihapon, dili pa lig-on inyong gibati sa usa’g-usa. Nganong mahanaw man dayon tungod lang kay wa mo magkita. Gani, kun tiunay inyong gibati, mosamot inyong kamingaw ug hinangop sa usa’g-usa. Apan sa mabaw ra’g pundasyon sa relasyon, dali ra kini mohupas ug mohubas dayon. Wa ka kabantay gipapili ka niya o sa imong pagka- bokalista. Ayaw’g tunob sa laang. Dili ka angay mamili. Lain-lain sila apan pareho nga parte ug importante sa imong kinabuhi. Mura ra ka’g nagkumpara sa mansanas ug kahel. Wala’y punto, sama sa papilion ka pamilya o siya, barkada o siya. Sila tanan importante, dili puwede ihikaw, apan siya magpabilin nga labaw.

Sukod sab ni sa iyang gugma kanimo mismo. Kay kun gihigugma gyud ka niya,  duawon ka niya sa Boracay kun dili na siya kaagwanta, aron sab makita’g makomusta ka. Dili pa siya ana, magbalik-balik siya sa paraiso, naa pa gyud iyang Eva didto.  —Tito Miguel

Magpatambag ka? Ipada kang Tito Miguel: 0991-318-9366