E-Painters naka-5 sunod
MANILA, Philippines — Muntik masayang ang sinasakyang winning streak ng Rain or Shine matapos pabayaan ang itinayong 22--point lead sa second period at makalapit ang NorthPort sa four-point deficit sa third quarter.
Ngunit sa huli ay tinalo pa rin ng Elasto Painters ang Batang Pier, 115-105, para sa kanilang pang-limang sunod na ratsada sa Season 48 PBA Philippine Cup kahapon sa Ninoy Aquino Stadium sa Malate, Manila.
Humugot si big man Beau Belga ng 18 sa kanyang career-high 28 points sa first half bukod sa 13 rebounds, 7 assists at 2 steals para igiya ang Rain or Shine sa 5-4 record.
“Siyempre, natutuwa kami dahil consistent nga si Beau. Kailangan talaga niyang mag-double time. Kulang kami sa malaki, hindi pa rin nakakalaro si Keith Datu,” ani coach Yeng Guiao.
Nag-ambag si Jhonard Clarito ng 17 markers at may 16 at 12 points sina rookie Adrian Nocom at Mark Borboran, ayon sa pagkakasunod.
Laglag ang NorthPort sa kanilang ikatlong dikit na kamalasan para sa 4-4 marka at nakahugot kay rookie Zav Lucero ng career-high 29 points kasunod ang 26 markers ni Allyn Bulanadi.
Iginuhit ng Elasto Painters ang 40-18 bentahe sa 6:55 minuto ng second quarter mula sa basket ni Mac Belo hanggang makalapit ang Batang Pier sa 56-60 sa 6:22 minuto ng third period.
“I think primarily this win is because we had a good start,” ani Guiao. “From there medyo nagkaka-streak sila, makakabalik kami, naalagaan na namin.”
Tinapos ng Rain or Shine ang nasabing yugto bitbit ang 81-72 abante patungo sa 110-96 pag-iwan sa NorthPort sa huling 1:44 minuto ng final canto.
- Latest
