Naaberyang wingvan natagak sa bung-aw

CEBU, Philippines — Nasamdan ang drayber sa usa ka kargadong wing van human kalit nga miatras ang iyang sakyanan ug nahulog sa bung-aw samtang iya kining giayo sa daplin sa National Highway sa Sitio Sandayong, Barangay Liki, lungsod sa Sogod, Cebu, alas-12:40 niadtong Septiyembre 15.

Matud pa sa Sogod Municipal Police Station, temporaryong gipahunong sa drayber ang wing van kilid sa highway human kini giingong naaberya.

Samtang nag-ayo siya sa ilawom sa sakyanan gikatahong kalit kining miatras ug naligsan ang iyang tiil.

Wala na mapugngi ang paglihok sa wing van nga mitabok pa sa pikas lane sa highway sa wala pa kini nahulog sa bung-aw.

Dali dayong gidala ang drayber sa usa ka lokal nga ospital tungod sa naangkong kadaut sa iyang tiil. Wala nay laing tawo nga nasamdan sa maong insidente.

Base sa inisyal nga imbestigasyon, gituohang ang wala tuyoa nga paglihok sa sakyanan samtang giayo kini sa daplin sa dalan maoy hinungdan sa nahitabong disgrasya.

Nagpahinumdom ang Sogod Municipal Police Station sa tanang motorista nga susihon kanunay ang kahimtang sa ilang sakyanan sa dili pa mobiyahe ug sundon ang BLOWBAGETS  safety checklist aron malikayan ang mga disgrasya sa kadalanan.— IBM BANAT NEWS