Mora’g milurang

Komusta na kaha ang imbestigasyon sa mga flood control project sa nasud nga giingong namantsahan sa korapsiyon nga naglambigit sa pipila ka magbabalaod, mga opisyal sa kagamhanan ug dagkong kontraktor.

Hapit na ang usa ka tuig human gibutyag ni Presidente Bongbong Marcos atol sa iyang State of the Nation Address ang halapad nga korapsiyon sa mga proyekto sa kagamhanan, ilabina sa mga flood control projects.

Mora’g milurang man ang kampanya batok niadtong mga nalambigit sa mga proyekto nga mobalor og gatusan ka bilyon ka pesos nga gisurikbot sa mga balhiboon og kamot nga mga magbabalaod ug opisyal sa DPWH.

Hinuon, adunay mga nagtingkagol karon sa bilanggoan gumikan sa mga kaso nga ilang giatubang may kalabotan sa mga flood control project. Kini sama nila ni kanhi senador Ramon Revilla, Senador Jinggoy Estrada ug ang Discaya couple nga mga kontraktor.

Apan, alang sa mga ordinaryo nga mga Pilipino, kulang sa paningkamot ang kampanya batok sa maong scandal. Ambot unsay nakalangay sa kagamhanan pagsang-at og kaso batok sa uban pang nalambigit sa maong kontrobersiya.

Tungod ba kaha kini sa impeachment trial ni Bise Presidente Sara Duterte nga maoy gikabisihan sa Senado karon? Mao nang mora’g nasapawan na ang imbestigasyon sa flood control scandal.

Dinhi sa lalawigan sa Sugbo, gikataho nga adunay girekomendar nga kaso ang National Bureau of Investigation batok niadtong giingon nga nalambigit sa kontrobersiya sa flood control projects sa tirsero distrito.

Hinaut nga tinud-on gayud kining pagpasaka sa maong mga kaso.

Kini aron manubag gayud kadtong mga nalambigit sa maong kontrobersiya ug magsilbing leksiyon ngadto sa ubang corrupt nga opisyal sa kagamhanan.