I-impeach ang presidente

Pulos seryoso ang mga pasangil nga gibato karon batok ni Presidente Ferdinand Romualdez Marcos Jr. (PBBM). Una, ang pasangil ni kanhi kongresista Zaldy Co nga siya ang nagmando nga isalot ang P100 ka bilyon sa 2025 national budget nga napunta ngadto Department of Public Works and Highways nga gitukob ra pod sa mga bagangang buaya nga nagluko sa mga opisina sa gobyerno. Dugang pa ni Co nga nakadawat og P25 bilyones nga kickback sa P100 bilyon nga iyang gisalot sa 2025 national budget. Ikaduha, mao ang pasangil sa maguwang mismo niini nga si Senador Imee Marcos nga adik si President Bongbong Marcos Jr.  Asoy sa senadora nga bata palang sila kaniadto ug buhi pa ang ilang amahan nga presidente usab sa nasud, adik na si PBBM. Dugang pa sa senadora nga siya ang nagdani ni BBM nga pakaslan na si Liza sa pagtuo nga kun maminyo na kini mausab ug moundang na kini sa iyang bisyo apan daking sayop ang iyang gitoohan tungod kay sila naman hinuong duha ang nagdrugas ug naapil pa ang ilang anank nga si Zandro. Buntag pa lang, pamahaw na ni Presidente Bongbong Marcos ang marijuana ingon man ang cocaine uban sa iyang mga barkada. Ang pagpangawkaw ug adiksiyon mga seryosong pasangil nga dako og epekto sa liderato ni Presidente Bongbong Marcos. Kinsa pa man ang motuo sa presidente sa iyang kampanya batok sa pagpangawkaw kun siya mismo bilyon ang gikawkaw. Kinsa pa,man ang motuo kaniya sa iyang kampanya batok sa gidili nga drugas kun siya mismo naadik niini. Wala na siyay moral ascendancy. Ang pangawkaw ug adiksiyon pulos kasong kriminal. Sa balaud ang naglingkod nga presidente sa nasud dili puwede nga pasakaan og kaso tungod kay anaa siyay immunity from suit. Kinahanglan una siya nga tangtangon sa iyang katungdanan sa dili pa siya pasakaan ig kaso.

Sa atong Batakang Balaud ang Presidente matangtang lamang sa iyang katungdanan pinaagi sa impeachment. Usa sa nga basihan sa impeachment mao ang graft ug corruption o pagpangawkaw. Usa kini sa gibasihan sa mga kongresista sa ilang pag impeach ni Besi Presidente Sara Duterte.

Kun gi-impeach sa mga kongresista nga kaalyado ni Presidente Bongbong Marcos si Bise Presidente Sara Duterte tungod sa ilang giingon nga kuwestiyonable nga pag gasto sa usa ka gatos ka milyon kapin nga intelligence fund niini, ang presidente pa kaha nga gipasanginlan nga nangawkaw og 25 bilyones ka pesos?  Kun ang mga kongresista tinuod gayod nga dili gusto og korapsiyon ug wala mamolitika sa ilang pag-impeach ni VP Sara gihagit ko sila sa pagpasaka og kasong impeachment batok ni Presidente Bongbong Marcos Jr.