EDITORYAL - La Niña na sab

Daghan ang nalipay nga dunay nasigpatang low pressure area nga posibleng mahimong bagyo nga mosud dinhi sa Pilipinas ug maapektahan ang Sugbu.

Tingali resulta kini sa kataas sa mga buwang grabe ang kataas sa temperatura. Gani duna pay mga netizens nipakita nga nagluto og itlog pinaagi lang sa kainit sa adlaw aron ipakita kun unsa gyud ka grabe ang kainit sa panahon, normal ra man unta ang ting-init sa Pilipinas apan nagrabehan lang tungod sab sa pagdungan sa El Niño.

Karong bag-o, ang PAGASA miingon nga dunay posibilidad nga kining LPA nga posibleng motugpa sa kayutaan sa Bicol region, mapormang bagyo ug pagatawgong Aghon, nakapalipay gamay sa mga tawo.

Apan samtang mahupay na tuod ang grabeng kainit sa panahon, lain na sab nga problema ang dala aning bagyo ug kining pagsige og bunok sa uwan.

Kini mao ang baha, landslides, ug mudslides. Taas-taas kaayo ang mga bulan nga naughan ang mga sapa ug mga kanal, nalimpyuhan na ba kini sa mga gitahasang mga ahensiya sa lokal ug nasudnong gobiyerno?

Milihok ba anang nanglabay nga mga buwan ang mga barangay officials nga managana sa pagabot sa tinguwan samtang dili pa tantong busy ang mga kanal diha sa ilang mga hurisdiksyon?

Maayo para niadtong mga nagpakabana daan, apan sa kadtong mga nagmika lang sa ilang mga opisina, uwahi na sab kaayo silang manapo kun lunopan nasab ilang mga lupa nga bahin sa ilang barangay.

Kun ang ting-init nigrabe tungod sa El Niño ug daghan ang naperhuwisyo, karon ting-uwan unya nisulod sab ang La Niña, gipangandaman na ba kini sa LGUs?

Kay karong bag-o, mas naglanog-lanog man sa mga lokal nga opisyales ang pagdinautay sa ilang mga kaatbang sa politika ug kaatbang nga mga partido kay gusto nang magpahumot daan kay eleksyon naman sab sa sunod tuig.

Mas maayo tingaling gamitong sukaranan sa katawhan para sa ilang local officials kun unsa ilang mga nahimo paghatag og alibyo sa ilang kinabuhi atol sa El Niño ug ning La Niña aron sila botaran pagbalik sa 2025 elections.