Naandan na

Dili na bago sa Senado o sa kinatibokan nga Kongreso ang pag ilis sa ilang mga pangulo.

Niadtong Oktubre 13, 2020 mibiya sa iyang katungdanan isip Speaker of the House of Representatives si Allan Peter Cayetano human niya masayri nga papahawaon na siya sa mayorya sa mga sakop sa Ubos Balay Balauranan isip ilang pangulo. Mihulip kaniya si Marinduque Congressman Lord Allan Velasco.

Niadto pong Lunes, Mayo 20, 2024 mikanaug sa iyang katungdanan isip Presidente sa Senado si Senador Juan Miguel Zubiri human sa duha ka tuig nga paghupot niini. Mikanaug sa iyang pagka Presidente sa Senado si Zubiri human niya masayri nga 14 sa iyang mga kauban nga Senador ang nagkasabot nga papahawaon siya sa katungdanan.

Niadtong Agosto 3, 2011 mibiya usab sa iyang pagka Senador si Juan Miguel Zubiri ug giinsister nga wala siya manikas sa 2007 nga eleksiyon. Ang Senador mibiya human niya masayri nga ang Senate Electoral Tribunal mopakanaug na sa ilang hukom nga nagdeklarar ni Atty. Koko Pimentel nga maoy mananaug sa ika 12 nga puwesto sa Senado sa 2007 nga eleksiyon.

Si Pimentel ug Zubiri nag ilog sa ika 12 nga puwesto sa Senado apan giproklamar nga mananaug si Zubiri. Tungod niini, miduso og election protest sa Senate Electoral Tribunal (SET) si Pimentel tungod sa iyang giingon nga grabing tikas sa eleksiyon sa lalawigan sa ARMM ug Maguindanao. Ang SET mideklarar ni Koko Pimentel nga mananaug sa 2007 nga eleksiyon.

Maingon nato nga naandan na ni Juan Miguel Zubiri ang graceful exit o maayo nga pagbiya sa katungdanan. Sa duha ka higayon, klaro ug wala nay mahimo si Zubiri sa pagkupot sa katungdanan maong mibiya ug mikanaug na lang. Mas maayo kini nga paagi sa pagbiya kay sa pugos ka nga papahawaon sa katungdanan nga medyo uwaw.