Paglaktaw sa media
Gipili ni Bise Presidente Sara Duterte Carpio ang paghimo og video statement pagtubag sa kasuko batok niya nga gipadayag ni First Lady Liza Araneta Marcos nga nagpa-interview sa niaging semana. Wa siya magpa-interview o mag-press conference nga mahimong makapasupot ang media og dugang mga pangutana.
Wa hinuoy kalainan ang pakighinabi ni Mrs. Marcos sa iyang napilian nga sakop sa media nga napakyas sa pagpangayo og dugang detalye sa labing kontrobersiyal niyang mga sulti. Mahimong kabahin kadto sa sabot, apil ang pag-aprobar sa mga pangutana, sa paghimo nga eksklusibo sa interview.
* * *
Si VP Sara ug Mrs. Marcos igo lang nipadayon sa naandan nga paglikay sa tinuod nga pakisusi sa media sa ilang kampanya sa eleksiyong presidensiyal sa 2022: Si VP Sara ug Presidente Ferdinand Marcos Jr. nilikay sa tanang presidential ug vice presidential debates nga gipasiugdahan sa Commission on Elections ug media organizations.
Maong, sama sa niaging kampanya, way nakahagit ug labaw nang way naka-kurihir sa tanan nilang sulti–bisan unsa kasayop. Ang ilang paglaktaw sa lehitimo nga media, sama sa niaging kampanya, nakahikaw sa katawhan sa kahigayonan pagsusi sa ilang kamatinud-anon.
* * *
Pananglitan, sa awhag ni VP Sara nga unahon ang Pilipinas: Makapangutana unta ang media kon mao ba ni hinungdan nga padayon siyang nagpakahilom sa nagkabangis nga mga pagpanghasi sa China sa West Philippine Sea?
Laing pananglitan, sa pangangkon ni Mrs. Marcos nga iyang manghod nga si Martin Araneta ug iyang kasosyo nga si Michael Ma ang kinadak-an og gasto sa ilang kampanya: Mapangutana unta siya nganong wa sila maapil sa Statement of Contributions and Expenditures (SOCE) sa iyang bana?
* * *
Mao ni masulub-ong kahimtang karon sa atong nasud. Ang mga nagtungkawo sa gahom ra ang magbuot unsay ipahibawo ug unsay itago gikan sa mga magbubuhis. Sama nga sila ray magbuot nga ulug-ulog rang mga pangutana ang tubagon ug ang makiangayon nga mga pakisusi isnabon.
Ang media organizations di na sab sama kalig-on. Naluya sa krisis sa pagbiya sa advertisers sa tradisyonal nga media pabor sa social media. Nagpabiling tuyhad mao na lang ang mga pamantalaan ug mga estasyon sa radyo ug telebisyon nga gipanag-iya sa mga alyado o sa mga haligi mismo sa administrasyon.
* * *
- Latest
