Imbestigasyon na pud

Mga magbabalaud gikan sa mayorya ug minorya sa Ubos Balay Balauranan ang nagkasabot nga kinahanglan imbestigahon si kanhi Presidente Rodrigo Roa Duterte tungod sa giingon nga kasabotan (Gentleman Agreement) nga gisudlan niini sa presidente sa China mahitungod sa suliran sa West Philippine Sea (WPS).

Giingon sa mga magbabalaud nga kinahanglan nga masayran sa katawhan ang gikasabotan sa duha ka presidente. Giingon sa opisyal sa minorya ug ACT Teachers Party-list nga si Kongresista France Castro nga tungod kay giangkon na mismo ni kanhi Presidente Duterte ang kasabotan nila sa Presidente sa China nga ipabilin ang sitwasyon sa WPS, kinahanglan nga tukion na sa ubos Balay Balauranan ang ilang giduso nga House Resolution Number 1216. Ilang gituohan nga ang kanhi presidente sa nasud ang nagpaluyo sa pagkuha sa BRP Sierra Madre sa Ayungin Shoal.

Ang tigpamaba sa kanhi presidente nga si Atty. Salvador Panelo mihulagway sa pagahimoon sa mga kongresista nga pag usik-usik lamang sa ilang oras tungod kay matud pa niya wala mosulod sa gipasangil nga kasabotan ang kanhi presidente.

Apan giingon ni Castro nga miangkon na si kanhi Presidente Duterte sa sekretong kasabotan nga gisudlan niini mao nga kinahanglan na gayod nga tukion ang ilang giduso nga resolution kay basin og wala ta masayod nga gibaligya na ni Duterte ngadto sa China ang West Philippine Sea.

Kun unsa man ang gisudlan nga kasabotan ni kanhi Presidente Duterte ug Presidente sa China wala na kini kinahanglana nga imbestigahon pa tungod kay wala na sa katungdanan ang kanhi Presidente. Ang giingon nga Gentleman Agreement o sekretong kasabotan dili gani kini binding sa  administrasyong Duterte tungod kay dili kini balido unsa pa kaha sa admimistrasyong Marcos.

Kay sekreto ang kasabotan, wala ta masayod kun executive treaty ba kini. Apan nakaseguro ko nga dili kini treaty kay ang treaty gikinahanglan nga ratipikahan sa 2/3 nga boto sa mga Senador. Ang Executive Agreement wala kini kinahanglana nga ratipikahan sa Senado apan para mahimong binding nanginahanglan kini og Executive aksiyon. Ang pakighigala ni Presidente Duterte sa China makonsiderar ba nga Executive aksiyon?

Mas maayo pa nga maoy tukion sa mga kongresista ang ka mahal sa bugas bisan og ting ani na.