Way nakadala og buot
Pito ka buwan sa wa pa maukay ang Senado ug nasudnong gobiyerno sa kontrobersiya sa Captain Peak Resort, nga gipasanginlang niguba sa kabahin sa Chocolate Hills sa Bohol, ang kontrobersiya detalyadong nasubay sa The Freeman sa Agosto sa niaging tuig.
Kagiyahan ang mga imbestigasyon nga himoon sa nagkalainlain nga mga ahensiya, nga giawhag nilang Senate President Pro Tempore Loren Legarda ug Senate Tourism Committee Chairperson Nancy Binay, kon ilang sublion ang tulo ka bahin nga special report ni Caecent No-ot Magsumbol nga napublikar sa Freeman sa Agosto 14, 15 ug 19, 2023.
* * *
Pipila sa kadaot sa Chocolate Hills sa Sagbayan, Bohol nga nakit-an ni Caecent ug giangkon sa mga opisyal sa Bohol ug Department of Environment and Natural Resources (DENR) nga iyang nahinabi:
Gikagis nga duha ka Chocolate Hills (gipanag-iya sa Barangay Canmano) sa pagpalapad sa agianan paingon sa resort; ug
Gikagis nga bahin sa laing Chocolate Hill (nga titulado sa tag-iya nga si Edgar Buton) sa pagtukod og swimming pool, children s pool, water slides, shower area dressing room, 10 ka cottages, function room ug laing 10 ka cottages nga paabangan.
* * *
Giila sa report ni Caecent ug sa buwag nga report sa Bohol Chronicle ang mga opisyal nga giingong nitugot sa mga proyekto:
Ang pagtukod sa resort giaprobahan sa Protected Area Management Board (PAMB) atol sa tigom sa Hulyo 22, 2022 uban ni Presiding Officer Tito Ancog, gi-review ni Penro Ariel Rica ug gi-concur ni DENR Regional Executive Director Paquito Melicor Jr. isip PAMB chair;
Ang pagkagis sa Chocolate Hills para sa access road giduso ni Barangay Kapitan George Bonajos Sr. sa Canmano kinsa niangkon nga gitugotan siya ni Sagbayan Mayor Restituto Suarez III.
* * *
Dugang timaan nga way nakadala og buot sa eskandalo:
Si Sagbayan Municipal Engineer Alan Dinoy niingon nga way pagtugot sa iyang opisina ang pagtukod sa access road nga nikagis sa duha ka Chocolate Hills;
Bisan giluwatan og closure order sa DENR Central Visayas sa Septiyembre 6, 2023 kay way environment compliance certificate (ECC), ang resort nagpadayon pag-operate; ug
Bisan wa marehistro sa Department of Tourism (DOT), ang resort gihatagan sa Philippine National Police (PNP) og tourist police personnel kay way security guards.
* **
- Latest
