Maayo ba kaha mag-senior?

Kaniadto, wa gyuy ganahang moangkon nga tiguwang, apan kay giusab man ang termino ug gitawag na man og senior citizen, dili na mauwaw kay daghan man nga benepisyo nga makuha gikan sa kagamhanan.

Para nako, nindot kon mahimo ka na nga senior citizen basta himsog lang ang imong panglawas. Abi ninyo og ngano?

Kon senior citizen ka na og moretiro na sa trabaho, makadawat ka og retirement benefits gikan sa imong kompaniya nga gitrabahoan, unya makakubra ka pa og pension gikan sa Social Security System (SSS).

Pananglit empleyado ka sa gobiyerno unya moretiro ka na, mas dako ang benepisyo nga imong madawat gikan sa Government Service Insurance System GSIS).

Kada buwan takulahaw lang nga mosulod sa imong account sa banko ang imong pension, ug ini’g ka Disyembre, modoble ang kantidad sa imong pension.

Ang mga senior citizen kon mokaon, mosakay og bus, barko ug eroplano, dako og diskwento kay kuhaon man ang 12 percent nga Value Added Tax (VAT), unya ibanan na usab og 20 percent nga senior citizen discount.

Kon ang usa ka senior citizen adunay sakyanan, way bayad ang pagparking sa mga pay parking area dinhi sa siyudad sa Sugbo kay dunay bag-ong ordinansa nga gimugna ang City Council.

Unya, kadtong mga senior citizens nga nagpuyo dinhi sa siyudad, way labot niadtong namalhin lang pagpuyo dinhi sa Cebu City gikan sa ubang dapit, makadawat og P12,000 nga cash assistance kada tuig.

Ang national government, ug ang pipila ka local government unit (LGU), duna sa’y gitanyag nga benepisyo nga hatagan og P100,000 kadtong mga senior nga moabot sa pangedaron nga 100.

Lisud gyud hinuon ang pag-abot sa maong pangedaron kon bisyoso ang usa ka tawo, sama sa hinigarilyo, palainom, kusog mokaon og mga mantikaon.

Karong bag-o na lang, dunay tinguha nga kadtong moabot na sa pangedaron nga 56, isipon na nga senior citizen ug makadawat na og mga benepisyo gikan sa kagamhanan.

Maayo kaha? Unya, ini’g ka senior na nila, paundangon na ba sab sila sa pagtrabaho? Pastilan kon kini mahitabo, daghan tingali ang magmahay kay daghan nga mawad-an na og panginabuhian.

Dunay uban nga bisan og senior citizens na apan makatrabaho lang gihapon, makakita ra gihapon og pangwarta, apan kadaghanan mora’g lisud na nga makatrabaho.

Aw, kinahanglan nga ang madawat nila nga retirement benefits gamiton gyud nila sa tinarong, sama sa pagsugod og negosyo aron nga dili sila magutman.

Angay sab nga kon sila maisip na nga senior citizens, dili sila magluya-luya nga tuyoon gyud nila nga hinay’ng molakaw sama sa ubang senior citizen nga akong makit-an.