EDITORYAL — Krisis sa tubig

Kinahanglang hatagan og seryusong pagtagad kaning umaabot nga krisis kung wala pa man kaayo mabatyagan sa suplay sa tubig karon dinhi sa Sugbu, kay sa dili magdugay dako kining problema sa mga Sugbuanon kun dili kini lihukon karon.

Ang maong krisis gibutyag sa kasamtangang tsirman sa board sa Metro Cebu Water District nga si Atty. Joey Daluz atol sa ekslusibong online interbyu sa igsuong pamantalaan sa Banat News nga The Freeman Hot Seat.

Si Daluz mibutyag nga sa unang adlaw palang niya paglingkod sa pwesto upat ka tuig na ang nilabay kuwang na daan ang supply sa demand sa mga konsumidor.  Ubos sa iyang termino napun-an ang mga tinubdan nga kakuhaan niini apan kuwang pa gihapon.

Mao sab ni ang hinungdan nga duna gyuy mga lugar ubos sa prangkisa niini ang walay tubig sud sa pipila ka oras matag adlaw tungod kay kinahanglang ipasa ang rota sa tubig ngadto sa ubang mga lugar nga wala masuplayi nianang adlawa.

Gawas pa, dunay daghang pribadong mga bomba sa tubig nga nakaingon sab sa pagmenus sa natural nga aquifer o pundohanan sa tubig mainom diha ilawom sa yuta.

Kinahanglan unta nga layo og panglantaw ang mga lider sa Sugbu ilabi na ang mga lokal nga kagamhanan kay sila mismo saksi aning paglambo sa ilang mga lugar.

Nagkadaghan ang mga tawo tungod sa nagkadaghan nga mga imprastraktura, negosyo ug komersiyo nga maoy nagpadagan niining tanan.

Kani palang daan paigo na mga basihan na para sa mga LGUs nga tabangan ang MCWD pagsigurong dili magkulang sa suplay sa tubig ang ilang mga konstituwente.

Pinaagi kini sa pagtabang pagpangita og mga dapit nga mabutangan og mga atabay, pagtugot sa mga pribadong kompanya nga makatukod og mga planta sa tubig sama anang ang desalination plants nga tubig sa dagat ang gamiton, pagtukod og mga dams sa mga dagkong suba o sapa ug uban pa.

Ang nag-unang trabaho sa MCWD mao ang distribusyon sa tubig ngadto sa mga konsumidor, apil sa ilang responsibilidad ang pag-instalar og mga tubo sa tanang mga dapit nga walay suplay sa tubig ug ang pagmentinar niini 24/7.

Dili na unta huwaton sa mga LGUs nga maabot sa puntong ang mga tawo mapugos nalang paghimo og kaugalingong mga bomba aron magkatubig.