Magmatngon sa mangingilad

Gipanghimakak sa embahada sa China nga aduna sila’y gimentinar nga mga “sleeper cells” nga mohimo’g mga infiltration ug intervention nga kalihokan dinhi sa Pilipinas.  Mahinumduman nga adunay nasikop ang NBI nga mga Chinese nga nakuhaan og mga armas. Gituohan nga gipahiluna na’ng daan ang maong puwersa sa China.  Normal ang reaksyon nga pagpanghimakak sa China.  Ang dili normal mao nga kon motuo ang atong kagamhanan sa maong pagpamakak.  Magmatngon kita sa China, kay ginaingon man nga, “Bisan dili unta angay tuohan, ang tanan motuo gihapon sa mangingilad kon siya maatigo ug may kahanas sa pagpangilad”.  Muleeng!

Mawad-an og pagsalig

Gitudlo ni Presidente Marcos ang fishing tycoon nga si Francisco Tiu Laurel, Jr. isip bag-ong kalihim sa Department of Agriculture, ang pwesto nga gihuptan sa pangulo kapin sa usa ka tuig. Masaligon ang Pangulo sa katakos ni Laurel tungod sa kasinatian ug koneksyon niini.  Sa krisis nga giatubang sa sektor sa agrikultura karon, hinaut nga ni’ng pagtudlo sa bag-ong Kalihim sa DA, matinuod ang panultihon nga, “Sa panahon sa krisis, motumaw ang mga maayong pangulo.”  Kay kon dili, basin maigo kita sa panultihon nga, “Kon ang pangulo walay kumpyansa, ang mga sumosunod mawad-an usab og pagsalig.”  Fezteleern!

Sa media lang gipatuman

Namahayag ang Bureau of Fisheries and Aquatic Resource (BFAR) nga nagsugod na ang closed-fishing season sa isda’ng galunggong sa kadagatan sa Palawan sugod sa Nobyembre 1, 2023 hangtud Enero 31, 2024.  Tuyo sa maong kamanduan nga mahatagan og kahigayonan ang mga isda sa pagsanay. 

Apan bisan sa pagpatuman sa maong lagda, daw nagkadiyot na man hinoon ang populasyon sa mga isda kon atong basehan ang pagpunay na lang og angkat sa gobyerno.  Matud pa bitaw sa akong amigo, “Wala tamda sa mga mananagat ang closed fishing season kay sa newspaper, radio ug TV ra man kini gipatuman sa BFAR.”  Pagkatoytoy!

Epektibo’ng makinarya

Giawhag ni COMELEC Chair George Garcia ang Kongreso sa pagpasar og balaodnon nga magtataw gayod sa pagka-nonpartisan nature sa barangay elections, gumikan sa daghang taho nga adunay mga local government officials nga giingon’g misawsaw sa pagpahigayon sa BSK Elections.  Morag nangayo ang COMELEC sa buwan ug bitoon niining kalakiha.  Sayod kita nga ang mga barangay officials maoy labing epektibo’ng makinarya sa kadaugan sa mga lokal ingon man nasyonal nga opisyal sa panahon sa eleksyon.  Mao na’y giingon nga, “Patyon mo ba diay  ang gangsa nga naghatag kanimo’g itlog nga bulawan?”  Pag-chure uy!

Pamatyon tanan’g tiguwang?

Mala-umon si Cebu City Mayor Michael Rama nga ang bag-ong napili nga SK leaders dili unta maduhig ug malambigit sa traditional politics, hinunoa, hatagan sila’g kahigayonan nga mosalmot sa kalihokan alang sa pagkab-ot sa Singapore-like vision sa dakbayan. 

Makadaghan na nato madungog ang maong matang sa panahom apan pulos lang kini storya kay sa tinuoray,  sa linghod nilang panghunahuna, nadangdang na ang kabatan-onan sa kagaw sa politika.  Mora’g adunay punto ang sugyot sa akong amigo nga, “Aron motunhay ang Pilipinas, maayo tingale nga pamatyon tanan’g tiguwang.”  Madahaan!