Kasinatian sa BSKE

Alas 5:00 pasado sa buntag sa miaging Oktubre 30, 2023, Barangay and Sangguniang Kabataan Election (BSKE) naligo na ko. Mga 6:20 a.m. taas na ang laray sa mga sakyanang miparking daplin sa dalan nga among naagian buyon sa eskuylahan paingon sa akong voting precinct.

Sa among pag-abot tungod sa entrance gate, labihang kiaykiay sa mga naghuot campaign materials, diin daw pulos maabiabihong mipahinumdom: “Botari baya ko ninyo, ha?” Nakaporke lang, dili tanang tarpaulin misunod sa tukmang gitugot nga sukod. Aduna gyoy nanglabaw. Simpleng basehanan, kon angay ba kining botaran?

Alas 6:35 sa buntag, didto na ko sa akong presinto, No: 1408A. Panglima ko sa kinasayohan. Ang mga maestra sa sulod wala pa makahuman sa pagpangandam. Ang nakamaot kay dihay bag-ong senior nga miabot, didto palingkora sa kinaunahang silya. Hinungdan, gisukna ko ang in-charge, unsay ilang paagi aron ang unang nahiabot nga senior dili maobertikan sa naulahi? Iyang tubag: “Ang naglarayng lingkoranan sa gawas.” Pastilan, dili diay first-come, first-served basis?

Ikaduhang kapalpakan, ang botante aduna diay gamayng pormang pil-apan: Precinct number ug Sequence number, diin kon wala ko mangutana, wala ko tagai. Ang akong nahibudngan, kay ang akong sequence number pareha diha sa milingkod nakong tupad. Hinuon, giklaro sa giduol kong teacher-in-charge, nga lahi mig precint number.

In fairness, 7:00 a.m., gisugdan nag pasulod og mga botante: 6 ka seniors ug 6 ka dili. Sa pilionong mga kandidato, gisulod-attached ra sa usa ka folder ang para sa Barangay ug ang alang sa Sangguniang Kabataan (SK). Rason, nganong dinhay usa ka botanteng hamtong na, kinsa mipalag. Sanglit, daw mix fruits ang gisulat sa iyang balota. Gisagol ang barangay councilor ug SK candidates.

Third floor ang gitas-on sa presintong akong gibotaran. Pagsaka nako ganina nag-abot akong ginhawa. Pagkanaog nako, nangita dayon kog pansayan kay kaganina rang pinugong nga dili mahibos ang kagawason nang giantos. Pero naunsa ba, nga pag-adto nako sa CR serado man. Aduna tinuoray abiyertong usa, apan may migamit sab. Haskang demalasa!

Unta, sunod election, 2025, mapangitaag sulbad sa atong kagamhanan kining matanga sa suliran, nga tingale naagian sab sa mga botanteng nag-wellchair.  Ayawat na lang, makuhakuhaan ang kaluyahong giantos na namong senior citizens.