Ikakatloag-Pito nga Adlaw

Mga Sakramental: Ang Balaang Insenso

Mga Sukaranang Teksto

“Ginoo ibayaw ko ang akong pag-ampo kanimo daw insenso? (Salmo 141;2)

“Ang 24 ka mga katigulangan nanghapa atubangan sa nating karnero. Ang matag usa kanila nagdala og kupa nga puno sa mga insenso sa mga pag-ampo sa mga balaan. “(Gip. 5;8).

Pasiuna

Sa mga higayon nga dunay dinagko nga kasaulogan ang atong Simbahan usa sa mga talan-awon nga atong makita mao man ang humot nga aso sa insensaryo diin gikan niini ang insenso. Ang detalye atong makita ning mosunod:

1.  Pagsugod sa Misa diin ang pari mo insenso sa sanktwaryo, sa altar, sa krus, sa mga imahen sa mga Santos.

2.  Panahon sa Ebanghelyo

3.  Sa liturhiya sa Paghalad.

4.  Sa Sanctus ug Konsagrasyon.

5.  Kun anaa ang Salve Regina, sa Imahen sa Mahal nga Birhen Maria.

6.  Mahimo usab kining gamiton panahon sa pagbendisyon sa mga lungon sa mga minatay nga ilubong.

Pagpalawom

Ang insenso simbolo sa atong parianong kaakuhan kun tulumanon diha sa atong pagsaulog sa Santos nga Misa. Alang kanatong mga Katoliko ang pagsunog sa Insenso nipahinumdom kanato ning mosunod:

A.  Presensiya sa Dios.

B.  Ang mga Pag-ampo nga atong Gibayaw

C. Mga Halad nato ngadto Sa Dios.

Ingon nga parianong lungsod atong tinguhaon nga mamahimo kitang maampoong katawhan alang sa Labaw nga Pari way lain kondili ang atong Ginoong Jesus. Dili sulagma labina gyud sa mga kabatan-onan ang pagsulod sa Balay Alampoanan. Hinunoa, kahigayonan kini nga atong ihalad ang atong  kaugalingon ingon nga insenso ngadto sa Dios. Kuyog sa atong pag-ampo atong iampo usab ang mga mahal nato sa kinabuhi nga nagkinahanglan kanato.

Unsay kalambigitan sa insenso diha sa atong pakig-asdang sa demonyo? Ato kining Mabasa sa basahon ni Tobit: “Nahinumdom si Tobias sa tugon ni Rafael. Busa gikuha niya ang atay ug kasingkasing sa isda sulod sa iyang puntil diin iya kining gitagoan, iya kining gibutang sa insenso nga nag-aso. Ang baho nakapalayas sa demonyo ug nikagiw kini ngadto sa Ehipto . gigukod siya ni Rafael ug hiapsan didto. Gigapos dayon siya sa kamot ug tiil.” (Tobit 8;2-3)

Pangamuyo

Samtang himoon nimo ang pagpaaso/palina sulod sa imong balay ampoa kining mosunod:

Ang Ginoong Dios pinaagi sa pangama ni San Miguel Arkanghel nga nagabarog sa tuong bahin sa altar sa Dios kuyog sa iyang mga pinili ang manalangin kanato ug ning insenso ingon nga humot nga halad ngadto sa Dios. Amen.

Kalihukan karong Adlawa/Pahimangno

Himoang Batasan ang pagpaaso/palina sa imong palibot kausa sa usa ka semana o depende sa panginahanglan. Seguroha nga ang insenso nga imong gigamit nabendisyonan sa pari.