Sugod na ang kampanya

Opisyal nang sugdan karong adlaw nga Huwebes, Oktobre 19, 2023 ang napulo ka adlaw nga kampanya sa mga kandidato sa Barangay ug Sangguniang Kabataan Election (BSKE).

Apan bisan pa man og karon pang adlaw nga Huwebes ang sugod sa pagpangampanya, sayod kita nga ang mga kandidato dugay rang nagsugod sa pagpaila sa ilang pagka kandidato ug nagpahinumdom sa mga botante nga sila magpapili ning Oktobre 30 nga bugnong lughaynon.

Dili nato mabasol niini ang mga kandidato ilabi na sa mga kandidato sa dagkong mga barangay sa nasud diin ang gidaghanon sa ilang mga sitio ug mga botante katumbas sa gidaghanon sa barangay sa usa ka lungsod o probinsiya sama sa Barangay Guadalupe sa dakbayan sa Sugbo nga ang botante hapit masusama sa gidaghanon sa botante sa lalawigan sa Siquijor nga gilangkoban sa unom ka lungsod.

Kining maong gidagkoon sa Barangay dili ni mahuman sa mga kandidato sa pagpangampanya sulod lamang sa10 ka adlaw.

Mao ni ang rason nganong mangita gayod og paagi ang mga kandidato nga makapaila sa ilang kaugalingon gawas sa gitakda nga panahon sa pagpangampanya nga gitugot sa Commission on Election (COMELEC) ilabi na gayod kadtong mga bagong magpapili sa bugnong lugaynon.

Sugyot nako sa atong mga magbabalaud nga usbon o amendahon ang gitas-on sa mga adlaw sa pagpangampanya sa mga kandidato sa barangay ug Sangguniang Kabataan nga piniliay. Puwede man seguro nga bahinon sa duha ka kategoriya ang gitason sa pagpangampanya sa BSKE sama pananglit sa pagtapok sa usa ka kategoriya sa mga gagmay nga barangay ug sa dagko nga mga barangay.

Ang gagmay nga Barangay puwede ra nga ipabilin ang 10 ka adlaw sa pagpangampanya sa mga kandidato niini pero sa mga kandidato sa dagko nga Barangay kinahanglan gayod nga lugwayan ang gitason sa adlaw sa ilang pagpangampanya.

Dinhi, mawagtang na seguro ang mga kandidato nga sayo nga mangampanya tungod kay sakto naman ang ilang panahon alang niini, dili naman sila mabalaka nga dili nila malukop sa pag adto ang mga lugar o dapit nga ilang kampanyahan aron mangindahay sa mga botante niini nga sila botaran ug suportahan.