Kugihan kayo

Nahibulong ko nganong si Kongresista Lolypop Ouano-Dizon daghan man og mga napatuman nga proyekto diha sa Mandaue City ug sa ubang mga dapit sa 6th District, samtang ang iyang mga kaubang kongresista way agi sa ilang distrito?

Kanunay ko nga makabasa og mga balita, unya makadungog sa balita sa radyo kabahin sa mga proyekto nga si Lolypop maoy nagpasiugda. Gusto unta nako nga pakighinabian si Lolypop bahin niini, pero “busy” man kaayo.

Kaniadtong Miyerkules, giswerte ko kay gikahimamat nako si Jojo Dizon nga bana ni Lolypop, ug kalit nga misantop sa akong hunahuna ang tinguha unta nako nga mahinabi ang iyang asawa nga kongresista.

Gitug-anan ko ni sir Jojo nga “busy” kaayo si Lolypop kay gani bisan sila panagsa na lang magkasultihanay pag-ayo tungod sa mga trabaho sa iyang asawa.

Pero gihatagan ko niya og ideya kon nganong daghan og mga proyekto nga nahimo si Lolypop bisan og gitangtang na ang Priority Development Assistance Fund (PDAF) sa mga kongresista.

Si Lolypop diay nakamaneho gihapon nga makakita og pundong salapi alang sa mga proyekto sa siyudad sa Mandaue, isip abag sa administrasyon ni Mayor Jonas Cortes bahin sa paghimo’g anti-flood projects ug uban pang proyekto.

Daghan og mga amigo si Lolypop ingon man si Jojo Dizon sa Department of Public Works and Highways (DPWH) ug mao nga nakahangyo sila nga magahinan og pundong salapi ang paghimo og anti-flood projects sa Mandaue.

May mga amigo sab sila sa Department of Labor and Employment (DOLE) aron ang mga kabus nga taga Mandaue makapatrabaho bisan sa mubo lang nga panahon.

Mao diay kini ang sekreto, ug tuod man natabangan ni Lolypop si Mayor Jonas Cortes nga matukoran og anti-flood projects ang Butuanon river aron dili na moawas ang tubig. 

Dinhing bahina, gisugyot nako ni Jojo Dizon nga masultihan unta niya si Lolypop nga mapangitaan og budget ang pagsulbad sa problema nga paglunop diha sa A.S. Fortuna Street, Mandaue kon mag-uwan.

Unta, ang gihimo ni Lolypop nga bisan og wa na’y PDAF ang mga kongresista, apan nakamaneho gihapon siya pagpangita og pundo aron padayon nga makahatag og serbisyo sa katawhan.

Tan-aw nako, swerte kaayo ang mga lumolupyo sa Mandaue nga nagkaalyado sila si Mayor Jonas ug si Lolypop. Galing lang kay dunay mga tawo kanunay’ng mangintriga aron lang gyud nga magkaaway ang duha ka opisyal.

Ang kanunay gyud nila nga ipalakaw nga tabi-tabi mao nga atbangan kuno ni Lolypop si Mayor Jonas sa pagdagan pagka mayor karong eleksyon sa 2025, butang nga wa gyud sa hunahuna ni Lolypop, matud ni Jojo.

Mao na nga ayaw mo padala sa mga intriga.