Gubat sa baha

Nalipay ko kay makita gyud nimo nga naglihok ang gimugna ni Mayor Michael Rama nga Task Force Gubat sa Baha kay kagahapon gipangguba na nila ang kapin sa 10 ka balay nga anaa gyud gitukod sa bukana sa Estero de Parian.

Ang Estero de Parian naila usab nga Parian Creek. Mao kini ang sapa nga ang bukana anaa mahimutang dapit sa tungatungang bahin sa Pier 2 ug Pier 3. Ang tumoy niining sapaa tua mosangko sa Legaspi Street ug Manalili Street.

Sigurado ko nga daghan ang wa pa masayod nga may sapa diay dihang dapita sa Legaspi Street, kay unsaon, nga ang sapa nasalipdan na man sa kabalayan ug mga estraktura.

Ang tag-iya sa 12 ka balay nga gitukod sa bukana gyud sa Estero de Parian, misugot na nga balhinon sila sa kagamhanan sa siyudad sa Sugbo.

Daghan pa nga kabalayan ug mga estraktura nga gitukod sa 3-meter easement, kun daplin sa Estero de Parian ang miboluntaryo na sa pagpaguba sa kabahin sa ilang mga estraktura ug panimalay agi og pagtuman sa balaod.

Sa walo ka dagkong sapa, ang Estero de Parian maoy nakahatag og labing dako nga problema sa kagamhanan sa siyudad kay kon moawas ang sapa, malunopan ang downtown area.

Mas malipay ta kon ang tagdumala sa Gaisano Main ug ang ubang mga estraktura sa downtown area, mopaguba na sab sa kabahin sa ilang balay patigayon.

Sa Gaisano Main, kinahanglang gub-on ang gibutangan nila sa ilang generator set nga anaa sa 3-meter easement, dayon ang groundfloor sa ilang gitukod nga grocery nga anaa gyud nagtabon sa sapa.

Gawas sa Gaisano Main, daghan pa nga balay patigayon nga nagtabon sa Estero de Parian, sama sa Colonnade, naa pay kan-anan diha.

Pag-anha nako diha sa maong sapa kaniadtong miaging semana, pwerteng lisura gyud kay mora ka og mosu’d og langob, unya, malakaw na nimo ang sapa kon magbutas ka, kay lapok na nga gahin ang sapa.

Dili na malimpyohan kay unsaon man, gitabonan na ang sapa ug dili makasulod ang excavator. Dili mahimo nga mano-mano lang sa mga tawo ang paghabwa sa sapa kay maabtan ta og “siyam-siyam” niana.

Pero misaad na kuno ang tagdumala sa maong mga balay patigayon nga gub-on nila ang kabahin sa ilang estraktura nga anaa sa 3-meter easement gikan sa tampi sa sapa, ug ang nagtabon sa sapa, kay kon dili gani, aw mapugos ang City Hall nga dili na i-renew ang ilang business permit.

Panahon na nga mag-estrikto ang kagamhanan sa siyudad sa Sugbo kay daghan ang mag-antos kon maglunop ang downtown area tungod sa abuso sa pipila lang ka tawo.