Baha ug lunop

Atol sa unang programa nako sa Sugboanon Channel kagahapon, ang problema kabahin sa baha ug lunop maoy akong gihisgotan uban sa deputy commander sa Task Force Gubat sa Baha dinhi sa Cebu City.

Si Koronel Jefferson Omandam maoy deputy commander sa Task Force Gubat sa Baha, ug pangabaga ni Heneral Roy Cimatu nga gitugyanan ni Mayor Michael Rama pagpangita og sulbad sa problema sa paglunop dinhi sa siyudad.

Dunay walo ka dagkong sapa dinhi sa Cebu City, apan ang unom ra niini maoy naghatag og dakong problema sa mga opisyal sa dakbayan.

Ang walo ka sapa mao ang Bulacao river, Tagonol waterway, Kinalumsan river, Guadalupe river, Estero de Pari-an, Lahug river, Mahiga River, ug ang sapa diha sa Talamban nga modagayday sa Butuanon river sa Mandaue City.

Gawas sa Guadalupe River, kining ubang sapa dinhi sa dakbayan sa Sugbo nahimo na nga gamay tungod sa mga tawo nga hangol kaayo’g pwesto, ug mipalapad sa ilang mga luna ngadto sa kasapaan.

Sama sa Estero de Parian nga gikan sa bukana niini dapit sa Pier 3, lapad kini kaayo kaniadto base sa karaang mapa nga akong nakita nga gihimo kaniadtong tuig 1873.

Ang mga bangka mosu’d gud dinhi dapit sa Colon kay magkarga og mga produkto nga pabayloan nila bisan unsa sa mga lumad. Apan karon, ang bangka dili na molutaw, ug gamay na kaayo ang sapa.

Nahibawo ba kamo nga kaniadto dunay usa ka linaw (lake) sa bahin sa Estero de Parian? Makita nimo kini sa karaang mapa ug diha kini mahimutang sa dapit sa Zulueta Street.

Tumong karon sa Task Force Gubat sa Baha nga mahibalik ang karaang gidak-on sa atong kasapaan kay aron nga hingpit na nga masulbad ang problema sa paglunop dinhi sa siyudad.

Unta, suportahan kini sa katawhan ang maong tinguha sa Task Force Gubat sa Baha. Tinuod, dunay mga pamilya nga apektado niini kay maguba man ang ilang balay daplin sa sapa, apan makaayo kini sa kadaghanan.

Ingon man, way pagpinig ang pagahimoon sa Cebu City government kay apilon man sa pagpaguba ang kabahin sa mga balay patigayon nga gitukod daplin sa sapa, ug ilabi na kadtong nagtabon gyud sa kasapaan.

Mao kini ang akong tahas nga tan-awon kon wa bay pagpinig ang pagpatuman sa paghawan sa daplin sa kasapaan, ma dato man ug pobre, kay ang gilantaw sa mga opisyal sa dakbayan mao ang kaayohan sa kadaghanan.

Sayonan ka nga kon maglunop na, apektado man ang biyahe sa atong mga sakyanan ug ang katawhan mismo. Busa, palihug, ato kining suportahan ang Gubat sa Baha.