Walay limitasyon ang damgo

Kompiyansa si Presidente Ferdinand “Bongbong” Marcos Jr. nga mapaubos sa iyang administrasyon ang kilo sa bugas humay sa tag P20 lukop nasud.

Kini ang gipamulong sa Presidente atol sa iyang pagpangapod-apod sa 1,500 ka sakong bugas nga pinalusot ngadto sa mga benepisyaryo sa Pantawid Pamilyang Pilipino Program (4Ps) dihang mibisita siya sa bodega sa National Food Authority (NFA) sa Zamboanga City.

Gipasabot ni Presidente Marcos nga kanunay nga adunay kahigayonan nga moubos pa ngadto sa tag P20 ang kilo sa bugas kana kun matarong na ang produksiyon sa bugas, dili na ta kanunay nga agian og bagyo ug magamit na usab sa mga mag-uuma ang tabang nga gihatag sa gobyerno ngadto kanila.

Dugang pa sa Presidente nga nagsilbi usab nga sekretaryo sa Departamento sa Agrikultura nga ang pagpaubos sa gasto sa pag-uma ug produksiyon mao ang yawe aron mabarato ang presyo sa bugas.

Si Presidente Marcos nagkanayon nga ang pagkabot sa tumong nga pagpabarato sa bugas nanginahanglan og pagtubag sa kadena sa gasto ug pagpalambo sa pagka epektibo sa produksiyon sa humay.

Aron mapalambo pa ang kita sa mga mag-uuma ug mahatagan og kaseguroan ang suplay sa bugas, ang National Food Authority Council nga gipangulohan ni Presidente Marcos mitugot sa pagpatuman sa bag-ong presyo sa palit sa humay nga nabuwad na ug wala pa niadtong adlaw mga Lunes. Ang palit sa NFA sa wala pa mabuwad nga humay anaa sa tag P16 ngadto sa tag P19 ang kilo samtang ang nabuwad na nga humay paliton kini sa tag P19 ngadto sa tag P23 ang matag kilo.

Maayo unta kun kining maong presyo miabot  gyod ngadto sa mga maguuma kay morag makaginhawa na sila og gamay sa ilang pagpanguma.

Dili sayon ug dili lalim ang gasto sa pag uma. Mahal ang suhol sa pagpa-uma ug mahal pa gyod ang abono unya paliton lang og barato. Nasinati ko kini kay may gamay kung umahan sa Bohol. Sa akong kadismaya, ako nalang gipatrabaho og lain ang gamay nakong basakan.

Sa P20 nga presyo sa bugas sige lang ayaw mo kabalaka kay way limitasyon ang damgo.