Ang Sala: Ganghaan sa Yawa sa atong Kinabuhi

Ikanapulog- Pito nga Adlaw

Sukaranang Teksto

Basaha ang Gen. 3;1-13

Pasiuna

1. Ang Sala usa man ka dakong babag sa atong kalambigitan sa Dios.

2.  Ang tawo nakasala kun anaa kaniya ang kahibalo, kagawasan, ug kabubut-on sa pagbuhat sa bisan unsang akto.

3. Atong gipasakitan ang Dios ug ang atong isig ka ingon sa mga higayon nga kita makasala. (CCC 1850)

Pagpalawom

1. Sa Griyego ang sala gitawag og Amartia kun sipyat. Sa maong sipyat, daw nababagan ug naguba ang katibuok sa atong pagkatawo, diha sa konteksto sa atong kalambigitan ngadto sa Dios.

Nahimo kining dakong babag sa paglihok sa grasya sa atong kinabuhi. Sa matag higayon nga kita makasala nahimo kitang halayo gikan sa Dios. Butang gikalipay sa yawa kun ang tawo makasala sanglit kini man ang iyang ganghaan aron makapanghilabot siya sa atong kinabuhi.

2. Ang tawo dunay hustong pangisip dili sama sa mga hayop nga nilihok lamang segun sa ilang instincts. Ang kahibalo kun unsay maayo ug unsay dautan gahum nga atong nahuptan isip tawo. Kun nahimo kitang nasayud sa kadautan sa usa ka buhat apan ato gihapong gihimo nan, nakasala kita. Ang kagawasan sa paglikay niini o sa paghimo niini kahigayonan man gyud unta sa pagpadayag sa atong kamatinud-anon ngadto sa Dios apan atong gihimo ang sala bisan pa man kun kita nasayud nan, nakasala kita.

Ang kabubut-on nato nagtukmod sa paghimo sa sala, dugokan naman nga ang maong buhat atong gituyoan.

3. Gihigugma sa Dios ang kalibutan mao nga gipadala niya ang iyang kaugalingong Anak aron si bisan kinsa nga motuo kaniya dili mamatay kondili makabaton og kinabuhing dayon. (Jn. 3;16). Apan sa makadaghang higayon atong gilansang pagbalik ang atong Ginoo gumikan sa atong mga sala.

Sa makadaghang higayon atong gipahilayo ang atong kaugalingon gikan sa Dios gumikan sa atong mga sala. Padayon kitang nagsakit kaniya.

Pangamuyo

Pasayloa Jesus

Kun may nasamdang balatian, kun dunay akong gipasakitan ug kun may luhang napahiran. Pasayloa Jesus/kun dunay tawong nagkinahanglan sa bisan unsa nga hinabang unya wala nako maatiman.

Pasayloa Jesus. Ang akong mga kasaypanan, natug-an ko sa kumpisalan usab kadtong nahikalimtan. Pasayloa Jesus. Pasayloa Jesus.

Kalihukan Karong Adlawa

Himoa ang pagkumpisal karong adlawa