Ikalimang Adlaw

Ila-ilaha ang imong kaaway nga mao ang yawa ug giunsa niya paggamit ang sala aron sa Dios kita mahimulag Sukaranang Teksto

“Pagmaigmat ug pagmabinantayon kamo kay ang inyong kaaway nga mao ang yawa naglibotlibot kaninyo sama sa liyon nga nagngulob, nangita og tukbonon. Lig-ona ang inyong pagtuo ug sukli siya kay nasayud kamo nga ang inyong isigkamagtutuo sa tibuok kalibutan gisulayan usab sa samang alantuson.” (1 Ped. 5;8-9)

Pasiunang mga Punto

1.  Tinuod ang Yawa ug aktibo siya.

2. Mahimong makasulod sa atong tawhanong kinabuhi ang yawa pinaagi sa sala.

Pagpalawom

1. Tinuod ang Yawa ug Aktibo siya. Ang atong pagtuo labina na ang Kredo (Nicene Creed) nagtudlo: Gibuhat sa Dios ang tanang butang, makita ug dilli makita. Kuyog sa mga butang dili makita mao man ang mga Espiritu nga gihimo sa Dios lakip na niini ang mga angheles sa langit. Usa sa mga Lucifer nga nahimong masupilon batok sa Dios. “Unya may gubat didto sa langit. Si Miguel ug ang kauban niyang mga anghel nakigsangka sa dragon ug ang  mga anghel niini. Apan nabuntog ang dragon ug ang mga anghel niini ug gipanghinginlan sila gikan sa langit. Gitambog ang dragon , ang karaang bitin nga ginganlan og Yawa, o Satanas nga mao ang nanlimbong sa tibuok kalibutan. Gitambog siya ug ang mga anghel niya ngadto sa Yuta.” (Gip. 12;7-10).

2. Mahimong makasulod sa atong tawhanong kinabuhi ang yawa pinaagi sa sala.

Ang sala kun amartia sa Griyego nga nagpasabot og sipyat. Usa man ka boluntaryong lihok nga komon natong mga tawo ug sa mga anghel. Sa ato pa anaa niini ang tutulo ka mga elemento. Una, Ang kabubut-on diin ang tawo nibuot nga iyang himoon ang usa ka buhat ug sayud siya dako uyamot niini. Ikaduha, ang kagawasan sa pagbuhat ug dili pagbuhat niini. Ikatulo, ang kagawasan, sa pagbuhat o dili pagbuhat niini. Kining tulo ka mga elemento ang makahimo sa usa ka binuhatan nga sala labina kun kini nahimong usa ka dakong supak sa kabubut-on sa Dios ug sa Balaod sa Dios ug sa iyang Simbahang Tinukod. Pangutana: “Sala ba ang tentasyon kun pagsulay?” Ang tubag dili apan mamahimo kining kahigayonan sa Sala! Ang kasagarang ig-on sa tentasyon mao mang ang atong mga ubos nga galamhan (lower faculties).

Ang atong galamhan kun dili mabantayan mamahimong agianan usab sa impluwensiya sa dautan. Ang sala maoy hinungdan kun nganong maputol ang atong kahiusa sa Dios. Ug kun kita anaa na sa sala, nan, dunay gahum ang yawa sa atong kinabuhi. Ang Sala mamahimong agianan kun ganghaan aron sa yawa kita maulipon. Bakakon ang yawa ug malimbungon busa pagmatngon gayud!

Pangamuyo Anima Christi

Kalag ni Cristo, Santosa Ako

Lawas ni Cristo Luwasa

Dugo ni Cristo, buyoha ako

Tubig gikan sa kilid ni Cristo hugasi ako

Kasakitan ni Cristo, lig-ona ako

O maayo nga Jesus pamatia ako.

Sulod sa imong samad, tagoa ako

Ayaw itugot nga mahimulag ako kanimo.

Gikan sa kaaway nga dautan panalipdi ako

Sa takna sa akong kamatayon, tawga ako

Ug sa pagbut-an mo, makadangat ako kanimo

Aron uban sa imong mga santos, daygon ko ikaw hangtud sa kahangturan. Amen!

Kalihukan karong adlawa

1.  Himoa ang pagsusi sa Tanlag (Examination of Conscience sa dili ka pa matulog)

2.  Himoang Batasan ang pagkumpisal nga maoy tambal sa atong pagkamasalaypon. (Ang Sakramento sa Kumpisal mas gamhanan pa kaysa Eksorsismo)