Bucor gikulata ni PDL Catarroja

Nagpasalamat ang publiko kay giimbistigahan dayon sa Senado ang nakapugang person deprived of liberty (PDL) Michael Catarroja human madakpig balik sa miresponding kapolisan gikan sa usa ka bulan niining pagkawala sa New Bilibid Prison (NBP) ubos sa pagdumala ni Bureau of Correction Director General Gregorio Catapang Jr.

Daghang concerned citizen ang nahibulong kon nganong nakaikyas si Catarroja nga anaa man kini gibutang sa maximum security compound, diin higpit gibantayan silang mga binilanggo sa CCTV ug jailguards. Unya, nganong nakaipsot pa man?

Pinaagi sa public hearing nga gipahigayon sa Senate Committee on Justice and Human Rights nga didto himoa sa NBP sa miaging Martes, Agosto 22, 2023, nahatagag tubag kining maong pangutana. Human pangutan-a ni Senador Francis Tolentino si Catarroja kon giunsa niya pag-ikyas, kini mitug-an:

‘Nga dihang may trak basurang miabot sa may ika-alas 9:00 sa buntag, mitabang kuno si Catarroja pagkarga sa mga basura.

Unya pagkataudtaod, adunay miaging van sa iyang tungod, diin nakahatag niyag daling kahigayonan sa pagsuong ilawom sa garbage truck, dayong tago didto sa chassis sa maong sakyanan. Matud niya, duna kunoy eksaktong katungtungan-kahigdaan og tawo ang nahisgotang chassis.

Busa, nakapuga gyod siya sakay sa maong garbage truck nga wala gyod moagi'g inspeksiyon sa nagbantay'ng guwardiya didto sa exit area. Usab, wala siyay nakitang salaming mitsek ilawom sa sakyanan sa ilang paggawas.’ Ingon niini kahuyang sa seguridad ang dinad-an ni Catapang sa Bucor, base sa gibulgar ni Catarroja.

Haskang dalia nakapasalig ni Catapang ngadto sa mga Senador, nga iya kunong estudyohag balik ang mga patakaran sa BuCor ug tingale butangan na niyag guwardiya ang tigkolektang garbage truck, unya dili na niya patabangog karga og basura ang inmates. Ug basin iapil na niya ang manglili nga salamin ilawom sa mosulod-gawas nga sakyanan.

Pastilan, puwerte gyong igoa ni Catapang sa katinuod nga pagtug-an ni Catarroja bahin sa grabing kapalpakan ni Catapang. I-review man niya ang unsay bating naandan ug pulihan og maayong bag-o, ulahi na kaayo tanan. Dili na niya matakpan ang bun-og sa kamatuoran nga gisuntok ni Catarroja sa iyang nawong. Ug bisag magmaskara pa siyag bulawan, dili na mogilak ang laksot niyang imahe sa mga mata sa katilingban.