Mahal ang ticket

Di lang irregular, matud sa Commission on Audit, ang byahe ni Mayor Michael Rama ug upat ka mga opisyal sa City Hall paingon sa Canada niadtong Agosto 19, 2022, nasakpan sab nga mas mahal ang presyo sa ticket sa eroplanong ilang gisakyan.

Sigun sa 2022 Annual Audit Report sa COA, migasto og P300 mil sa ilang ticket silang Rama, Karla Paula Henry-Ammann nga maoy executive director sa sister cities, Cinbeth Orellano nga maoy protocol officer, ug City Administrator Collin Rosell. Apan matud sa COA wa’y gipakitang presyo gikan sa airline ang mga opisyal.

Sa gihimong imbistigasyon sa COA ilang nasayran nga ang plete sa eroplano gikan sa Cebu paingon sa Vancouver anaa ra sa P25 mil ngadto sa P28 mil and one-way. Sa ato pa kun atong sumadahon P112,000 ang labing taas nilang plete sa one-way ug P224,000 ra ang two-way.

Namatikdan sab sa COA nga gipalabwan og duha ka adlaw og tunga ang gidugayon sa ilang byahe bisan kun Agosto 19 hangtud sa 25 ra ang aktwal nila nga pagpuyo sa Canada.

Sa ilang giduso nga mga dokumento Agosto 19 hangtud 27 kuno sila didto aron mosobra sab ang ilang daily subsistence allowance.

Iregular nang daan ang ilang byahe tungod kay matud sa COA wala masubay sa Executive Order 77 nga naglatid sa mga lagda ug regulasyon sa kantidad sa gasto ug allowance alang sa local ug foreign travel sa mga opisyal ug kawani sa gobyerno, gidugangan pa gyud og laing kwestiyonable.

Sigun sa record, migasto silang Rama og P1.992M sa maong byahe nga gitumong aron pagtambong sa enthronement sa imahin sa Sto Niño didto sa Shrine of the Sto. Niño de Cebu sa St. Anthony de Padua Parish sa Agassiz didto sa British Columbia sa Canada.

Matud sa COA nga si Rama lang ang dunay pagtugot gikan sa DILG secretary alang sa maong biyahe. Ang iyang mga kauban si Rama ray mipirma bisan wa siyay authority gikan sa DILG Secretary sumala sa gimbut-an sa Section 10 sa EO 77.

Ang Section 9 sa samang EO naglatid sab nga kinahanglang limitahan ang gidaghanon sa mobyahe sa usa ka kalihukan ngadto sa labing dyutay ug nga ang upat, matud sa COA, dili maisip nga maoy labing dyutay.

Unsa man tuod ang kapuslanan tulo ka mga kauban sa mayor didto nga mahimo ra man gyud nga siya maoy morepresentar sa dakbayan sa maong kalihukan? Duna pa bay laing mas haum ug takos nga morepresentar sa syudad gawas sa mayor?